Accessibility links

сишәмбе, 6 декабрь 2016, Казан вакыты 08:41

İrannıñ kürşe illäre İranda suğış başlanu ixtimalına borçılu belderä


İrannıñ atom programı tiräsendäge wazğiät qıza barğan ber mäldä, Washington belän Tährannıñ süz köräşterüe axır çiktä köç qullanuğa kitermäsme digän borçular da arta. Radiobıznıñ xäbärçeläre İran yänäşäsendäge illärdä yäşäwçe keşelärgä, İranda suğış başlansa, anıñ sezgä yoğıntısı nindi bulaçaq digän soraw birde.

İran tiräsendäge 3 ildä – Ğiraq, Ärmänstan, Gruziädä alınğan fikerlär şunı kürsätä: bu illärdä yäşäwçelär İranda suğış bik tä ixtimal häm ul başlanğan oçraqta anıñ töbäkkä yoğıntısı naçar bulaçaq, digän fikerdä. Cawap birgännärneñ kübese, Quşma Ştatlar yä İzrail İrannıñ atom qorılmalarına kisätü höcümnäre yasayaçaq, häm bu suğışqa kiteräçäk, dip sanıy. Misal öçen, Ğiraqnıñ Kördstan töbäge başqalası İrbildä yäşäwçe bu keşe:

"Minemçä, Amerika İranğa höcüm itäçäk, häm bu Ğiraqqa, İrannıñ başqa kürşelärenä faydağa bulmayaçaq. Çönki bu zur suğışqa kiteräçäk, İran atom qoralın qullanırğa mömkin, Amerika, Ğiraq, İranda zur problemnar bulaçaq" di İrbil keşese.

Gruziä başqalası Tiflista yäşäwşe Guram Janjgava küñelendä şul uq borçular:

"Älbättä, bu bezgä dä zıyan itäçäk, monda şik yuq. Bez İranğa yaqın. Amerikannar yıraq – alar bezneñ dus, Gruziäneñ dä berdän-ber köçle dustı. Läkin zıyanı bezgä bulaçaq. Amerika yıraqta, ä İran kürşedä genä" di Tiflis keşese.

Ärmänstanda yäşäwçe Caroline Zakaryan üze İran ärmäne, suğış başlansa çik aşa iranlılar ağıla başlayaçaq, dip qurqa:

"Suğış başlansa iranlılar häm İran ärmännäre Ärmanstanğa küpläp kilä başalayaçaq. Min soñğılarına qarşı tügel, bu alarnıñ watanı. Läkin iranlılar Ärmänstanda bolay da küp, 27 millionnıñ 3 millionı monda kilsä, Ärmänstan İranğa äylänäçäk. Suğış başlansa zıyanı Ärmäsntanğa da tiäçäk – açlıq, awırular, qorbannar" di Caroline xanım.

Döres, İranda suğış bulaçağında şiklänüçelär dä bar. Ärmäsntanda yäşäwçe Saroh Sargisyan isemle yeget, İran qüätle il, Amerika, kiläse yılda saylawlar bulasın da iskä alsañ, İranğa höcüm itergä cör''ät itmiäçäk, dip sanıy.

İranda suğış ixtimalı turındağı sorawğa qırısraq cawap birüçelär dä buldı. Äytik, Bağdadta yäşäwçe İlham Kamal, İranğa andıy höcüm kiräk, içmasam, Ğiraqqa yoğıntısı beraz kimer, dide.

Şulay da, küplär nizaqnı tınıç yul belän xäl itergä çaqıra. Misal öçen, Ğiraqtağı Azçılıqlar Şurası başlığı Xälim Äl-Qaddu:

"Bez andıy höcüm bulmas dip ömetlänäbez. Çönki bu suğış berkemgä dä faydağa tügel. Töbäk bolay da suğışlardan integä. Bez ayıq aqık ciñep çığar, İran belän Quşma Ştatlar arasındağı nizaq xärbi tügel, diplomatik yullar belän cişeler dip ışanabız" di Ğiraqtağı Azçılıqlar Şurası başlığı.

Ä Gruziädä yäşäwçe Baçuki Baçukişvili sorawğa soraw belän cawapladı: Bezgä suğış kiräkme soñ, bez xärbi nığıtmağa äylänergä telibezme? – dide ul. Häm üze ük – min ber genä närsä beläm – yawızlıqnı yawızlıq belän ciñep bulmıy, digän cawap qaytardı.

Ali Ğilmi
XS
SM
MD
LG