Accessibility links

пәнҗешәмбе, 8 декабрь 2016, Казан вакыты 13:05

Omskida dini seminar


Omski ölkäseneñ Seber yağı Diniä Näzäräte qaramağında bulğan mäçetlär imamnarı öçen 27 - 28 fevral' könnärendä seminar-uqular oyıştırıldı. Älege seminar şähärneñ Cämiğ mäçetendä ütte häm anda tatar häm qazax awılları mäçetläreneñ 25 imamı qatnaştı. Seminar ütkärüneñ töp maqsatın möfti- xäzrät Zölqarnäy Şakircanov, imamnarnı cıyıp, nindi yärdäm kiräk, nindi mäçetlärne tözätü, yaña mäçetlär salu öçen nindi çığımnar kiräk, şul xaqta, annan soñ imamnar qartaya, almaşqa yäşlärne äzerläw turında da söyläştek,-dip añlattı.

Möfti sanap ütkän sorawlardan tış seminar eşeneñ berençe könendä süz awıllarda xalıqnıñ ni däräcädä dingä tartıluı turında da bardı. İmamnar äytüençä, tatar awıllarında bötenläy yabıq torğan mäçetlär bulmasa da, keşe anda bik küp yörmi, yörgännäre dä comğa namazlarına ğına kilälär.

Bu xälgä qarata, mäçetlärne comğa könne genä açasız, kön sayın açıq bulsa äkrenläp keşe dä kilä torır ide, -dip, Möfti imamnarnıñ üzlären ğayepläde.

Şulay da Möfti-xäzrät Zölqarnäy Şakircanov awıl mäçetläreneñ yärdämgä moxtaclığı turında tağı ber qat assızıqladı häm Cämiğ mäçetenä kergän xäyer- sadäkälärdän yärdäm itü çarasın kürergä kiräk dip tä belderde.

Qayber imamnar üz awıllarında xalıqnıñ dingä qaraşı uñay yaqqa üzgärüe turında bäyän ittelär. Muromsevo rayonı Tazlar awılı mäçete imamı İsmağil Äxmetvaliev, mäçet bulmağan çağında öylärgä yörep namazlar uqıy idek, 2002 yıldan birle mäçetebez bar, namazlarğa yörilär, nikaxlar da uqıybız, yaña tuğan balalarğa isem dä quştırabız, xalıq küpläp qorban da çala, ğomümän dingä qaraş yaxşı, - dip söyläde.

Cämiğ mäçetendä imamnarnı cıyunıñ tağı ber maqsatı – dini oyışmalarnı terkäw häm yustitsiä orğannarına xisap birü räweşenä üzgäreşlär kertelüen añlatu ide. İkençe könne seminar eşendä Omski ölkäseneñ Federal' terkäw xezmäte idäräse belgeçläre Vasiliy Tkaç häm Aleksandr Çernov qatnaştılar. Alar Rusiä Federatsiäse xökümäteneñ 2006 yılnıñ 15 aprelendä qabul itelgän 212 sanlı qararı buyınça xisap birü räweşen täfsilläp añlattılar.

Annan soñ Möfti-xäzrät Zölqarnäy Şakircanov üzeneñ Talğat Tacetdin tarafınnan Seber Federal' okrugı buyınça möfti bulıp bilgelänüe turında belderde.

Seminarnıñ eşe tämamlanğanda,bolay üzara oçraşıp, bulğan problemalarnı urtağa quyıp söyläşü faydalı, häm kiläçäktä här yılnı mart ayında cıyılışırğa kiräk digän fikergä kilende, ber uñaydan yustitsiä orğannarı aldında xisap totunıñ döreslegen häm tögällegen dä tikşererbez, dielde.

Rozaliä Sayganova, Omski

XS
SM
MD
LG