Accessibility links

Кайнар хәбәр

Xärbi büleklärneñ “qara isemlege” tözelde


Yazğı xärbi çaqırılışqa ber aydan da azraq waqıt qalıp bara. Bik tizdän yegetlärebez yaqınnarı, tuğannarı belän sawbullaşıp, xezmät itärgä kitäçäk. Ä anda alarnı ni kötä? Anısın berkem dä belmi. Xärbi burıçların ütägändä zıyan kürgän Tatarstan yegetläre turında yış işetergä turı kilä. Irınbur ölkäseneñ Totski garnizonında xezmät itkän Radik Xäbirov ğömerlekkä invalid bulıp qaldı. Ul yaqınnarı yärdämennän başqa yäşi almaslıq däräcädä. Äle küptän tügel, Saxalin utrawınnan Çistay şähärenä 19 yäşlek Rail Bikmöxämmätovnıñ gäwdäsen alıp qayttılar. Häm bu isemlekne däwam itärgä bula.

Älege açı täcribäne istä totıp, Tatarstan premyer ministrınıñ berençe urınbasarı Rawil Moratov respublikanıñ xärbi komissarı Sergey Pogodinğa qurqınıç xärbi büleklärneñ isemlegen tözergä quşqan. Älege tikşerüdä Qazannıñ xoquq yaqlaw üzäge belgeçläre dä qatnaştı. Häm Qazan xoquqçıları tarafınnan xärbi büleklärneñ “qara isemlege” tözede. Bu isemlekkä Tatarstan häm şulay uq başqa töbäklärneñ yegetläre häläk bulğan yäki alarğa qarata xoquq bozular küzätelgän Rusiä xärbi bülekläre kertelgän. İsemlekkä barlığı 9 xärbi bülek kergän. Alar xaqında tulıraq itep Qazannıñ xoquq yaqlaw üzäge citäkçese İgor Şoloxov söyli:

İsemlekneñ başında 2004 yılnıñ cäyendä Leningrad ölkäseneñ ber xärbi bülegendä wafat bulğan yaqtaşıbız turında äytäsem kilä. Tatarstan yegete Räif Minhacev östenä benzin sibep, yanıp ülde. Minhacev xezmät itkän Leningrad ölkäse qara isemlekkä kertelde. Monnan tış, inde şaqtıy tanılğan Irınbur ölkäseneñ Totski xärbi garnizonı da älege isemlektä bar. Anda Qazan yegete Radik Xäbirov xezmät itte. 2006 yılnıñ cäyendä Baltıyk flotında xezmät itkän ber yaqtaşıbız utlı qoral yarasınnan wafat buldı. Ä uzğan yılnıñ axırında Saxalin utrawında Rail Bikmöxämmätov asılınıp ülde. Yıraq Könçığışnıñ Çıta şähärendä xärbi bülek komandirı soldatnı ber eşmäkärgä birep cibärgän. Tögälräk äytkändä, ul xärbine qolğa äyländergän. Eşmäkärdä soldat törle cir eşlären başqara, ä annarı yul häläkätenä oçrap, sälämätlegen yuğalta. Yeget xäzerge waqıtta gospital'dä däwalana. Tağın şunı da äytep kitärgä kiräk, “qara isemlek”kä Qazannıñ da ber xärbi bülege kertelgän. Äle küptän tügel anda Tübän Novgorod yegete qıynalğan bulğan, bu mäs'älädä cinayät eşe quzğatıldı.

Qazannıñ xoquq yaqlaw üzäge citäkçese İgor Şoloxovnıñ fikerlären işettegez. Qurqınıç xärbi büleklär isemlegen xoquqçılar Tatarstannıñ xärbi komissarına yullağan. Häm bu xärbi büleklärgä tatarstanlılar kiläçäktä cibärelmäyäçäk dip uylanıla.

Al'bina Zäynulla

XS
SM
MD
LG