Accessibility links

якшәмбе, 11 декабрь 2016, Казан вакыты 14:55

Ufa säxnäsendä - Tufan Miñnullin äsäre


Başqortstan Respublikasınıñ Mostay Kärim isemendäge Milli yäşlär teatrı kollektivında premyera bulıp ütte. Talantlı kollektiv kürenekle tatar dramaturgı Tufan Miñnullinnıñ tağın ber äsären - ädipneñ “Cankisäkkäyem” muzıkal' komediäsen säxnäläşterde.



Yäş talantlar Tufan Miñnullinnıñ moña qädär başqa teatrlar säxnälärendä dä quyılğan “Cankisäkkäyem” muzıkal' komediäsen äzerläp betep, premyeranı 28 fevral'dä häm 1 mart könne kürsätte. Zal ike köndä dä şığrım tulı buldı. Alay ğına da tügel, biletlar citmäw säbäple, uramda artıq biletlar sorap toruçılar da baytaq ide.



“Cankisäkkäyem”ne Mostay Kärim isemendäge BR Milli yäşlär teatrı rejisserı Röstäm Xäkimov säxnäläşterde. Anıñ äytüençä, bu äsär saf, eçkersez mäxäbbät xaqında. “Näq menä şundıy saf, ixlas toyğılarğa xäzerge tamaşaçılar kübräk susağan, - di ul. – Şuña kürä dä tanılğan dramaturgnıñ bu äsäre östendä eşkä bik teläp totındıq. İcat protsessı da bik ciñel bardı. Minemçä, bik küñelle tamaşa kilep çıqtı. Spektaklebez tamaşaçını räxätländerep kölderep kenä qalmıy, ä artistlarıbız küñelgä yatışlı köy-moñnar da büläk itä”, - di rejisser.

Başqortstannıñ Mostay Kärim isemendäge Milli yäşlär teatrı rejisserı Röstäm Xäkimov süzlärençä, p'yesada äytelüençä, här keşeneñ üzeneñ şürälese bula. Menä şul şürälelär keşene asılına qaytara.

Biredä Tufan Miñnullinnıñ “Cankisäkkäyem” äsäre nigezendä säxnäläşterelgän tamaşanıñ premyerası ütte. Muzıkal' komediädä töp rol'lärne Başqortstannıñ atqazanğan artistları Vener Kamalov, Näğim Nurğalin, Mars İtbaev başqara. Şulay uq küñelle tamaşada yäş artistlar Läysän Räximova, Gölşat Ğaysina, El'za Wälieva, İrek Bulatov häm başqalar da uynıy. Premyeranı tağın 7 mart könne dä kürep bulaçaq. Anda Tufan Miñnullinnıñ üzeneñ dä kilüe kötelä.

Fänis Fätxi, Ufa

XS
SM
MD
LG