Accessibility links

шимбә, 10 декабрь 2016, Казан вакыты 12:02

Başqortstan yağulıq tarmağın tikşerü däwam itä


Rusiä üzäk mäğlümat çaralarında härdaim päyda buluçı mäğlümatlarğa qarağanda, soñğı könnärdä Başqortstannıñ yağulıq-enegretiqa tarmağın tikşerü eşläre däwam itä. Älege tikşerüneñ täwge näticäläre mart azağına uq mäğlüm bulır digän süzlär bar. Elegräk tä xäbär itelüençä, nigezdä, Başqortstan Prezidentınıñ ulı Ural Räximov qaramağında bulğan respublika yağulıq-enegretiqa kompleksın çirattağı tapqır tikşerä başladılar. Bu tarmaqqa qarata Rusiäneñ Yuğarı Arbitraj mäxkämäse küptän tügel yaña däğwälar beldergän ide. Rusiäneñ Mäxkämä pristavları tikşerülärenä tayanıp, Arbitraj mäxkämäneñ Ural Räximov qulındağı şirkätlärneñ däwlätkä 43 milliard sumlıq burıçı buluı xaqında bäyän itte. Aldan äytelüençä, 25 mart könne ilneñ Yuğarı Arbitraj mäxkämäse älege eş buyınça berençe näticälärne bäyän itärgä tieş.



Şul uq waqıtta qayber bäysez elektron mäğlümat çaralarında Ural Räximovtan häm anıñ qayber xezmättäşlärennän respublikadan çitkä çığıp kitmäw turında ışandıru imzaları alınğanlığı turında da xäbärlär kürenä başladı. Ä Ural Räximovnıñ üzeneñ Ufanıñ 18 nçe sanlı xastaxanägä sälämätlegen nığıtırğa yatqanlığı mäğlüm.



Soñğı könnärdä Başqortstan cämäğätçelegeneñ iğtibarın Tatarstan Prezidentı Mintimer Şäymievqa bäyle imeş-mimeşlär dä cälep itte. Mäğlüm ki, Rusiäneñ qayber matbuğat basmaları häm elektron mäğlümat çaraları Şäymiev äfände wazıfasınnan kitäçäk ikän häm anıñ urınına älege Rusiä eçke eşlär ministrı Räşit Nurğaliev täğäyenlänäçäk ikän, digän farazlarnı quyırtıp cibärgän ide. Andıy xäbärlärne köne-säğäte belän digändäy, Başqortstannıñ räsmi gazetaları da küçerep bastı.



Şul uq waqıtta Tatarstan Prezidentınıñ Matbuğat xezmäteneñ älege xäbärlärneñ uydırma buluı turında belderüe, Mintimer Şäymievnıñ yaña ğına yıllıq yullamasın bäyän itüe häm 2 mart könne, cämäğäte belän bergäläp, tınıç küñel belän çirattağı yalına kitüe bu xäbärlärneñ çınlap ta uydırma buluına işarä kebek. Alay bulğaç, nigä soñ Tatarstan Prezidentına bäyle imeş-mimeşlär taratıla? Bu xälgä Başqortstandağı tanılğan ğalim, etnosäyasät belgeçe İldar Ğabdrafıykov menä nindi añlatma birä.

“Mintimer Şäymiev tiräsendäge imeş-mimeşlärne Mäsäkü Kremle tiräsendäge polittexnologlar tarata, - di ul. - Alar bıltır may ayında Mortaza Räximov qatı çirlägän häm ülgän, dip tä imeş-mimeş taratqan ide. Şäymievkä qarata bulğan imeş-mimeşlär saylawlarğa başlanğan äzerlek belän bäyle dip uylarğa kiräk. “Yedinaya Rossiä” belän “Spravedliva Rossiä tartqalaşa saylawçılar öçen”.

XS
SM
MD
LG