Accessibility links

шимбә, 10 декабрь 2016, Казан вакыты 04:06

Tailand politsiäse Rusiä turistların üterüneñ talaw belän bäyle buluına ışanmıy


Tailand politsiäse Rusiäle 2 turist qıznı üterüdä şiklänelüçe keşeneñ totıluı turında belderä. Fevral axırında bulğan bu üterüneñ säbäpläre turında matbuğatta törle imeş-mimeşlär taraldı. Ämma qulğa alınğan şikle keşe min barı tik alarnıñ äyberlären talarğa ğına telägän idem di. Tailand politsiäse isä üterüneñ säbäbe başqa bulırğa oxşağan dip isäpli.

25 yäşlek Lübov Svirkova belän 30 yäşlek Tatyana Tsimfer 27 fevraldä Tailandnıñ Pattaya utrawında diñgez yanında utırğanda ber keşe kilep alarnı atıp ütergän.

Uzğan şimbädä, 3 mart könne politsiä matbuğat oçraşuı ütkärep xäbärçelärgä üterüdä şiklänelgän keşene kürsätte.

Politsiä başlığı wazıyfaların ütäwçe Seripisut Taemiyaves 24 yäşlek Anuçit Lumlert totıldı häm ul qızlarnı ütergänlegen tanıdı dide.

Ämma ul äle haman da bu mäsälä çişelgän dip isäplämäwen dä belderde.

"Ul älege 2 qıznı talarğa cıyınğanda atıp ütergänlegen tanıdı, ämma bez moña ışanmıybız" dide politsiä başlığı.

Anıñ äytüençä, Tai politsiäse Anuçit üze genä eş itmägän dip isäpli. Gärçä qunaqxanäneñ iminlek kameraları Anuçitnıñ mototsiklda üzeneñ genä kilüen, qunaqxanä baqçası aşa diñgez buyına ütüen häm kire mototsiklı yanına qaytuın videoga yazıp alğan. Anuçit xätta üterelgän qızlarnıñ aqça yançıqların da almağan.

Anuçit 1 martta qulğa alınğannan soñ şahitlär dä anı üterüçe bularaq tanığan.

Anuçit bu üterügä qädär dä xökem itelergä tieş bulğan. Ul Könyaq Korea turistın talawda ğäyeplänep äle ğinwar ayında ğına yolım aqçası belän mäxkamägä qädär waqıtlıça irekkä çığarılğan bulğan.

Anuçit äytüençä, ul rusiäle qızlarnı talarğa telägändä qızlar qıçqıra başlağan häm ul alarnı atıp ütergän.

Politsiä başlığı bu üterü talaw belän bäyle tügel, monda ber törkem eş itä dip tulısınça ul törkemneñ qulğa alınuına ömetlänüen belderde.

Tailandnıñ qimmätle utrawlarınnan berse sanalğan Pattaya xalıqara cinayätçelär oyası bularaq häm fäxişälek belän kiñ tanılğan.

Naif Aqmal
XS
SM
MD
LG