Accessibility links

шимбә, 3 декабрь 2016, Казан вакыты 01:36

İñ şäp xatın-qızlarnı qotladılar


Yaznıñ berençe könnärendä Tatarstanda bıyıl da iñ aldınğı, iñ uñğan xanımnarnı büläklädelär. Hönäri eşçänlektä häm şulay uq balalar tärbiäläw eşendä yuğarı bäya alğan 950 xanım “Piramida” küñel açu üzägendä uzğan tantanada qunaq buldı. Alarğa Tatarstan prezidentı isemennän Däwlät Şurası räise Färit Möxämmätşin täbrikläw süzlären citkerde.

“Yıl xatın qızı” bäygese respublikada inde un yıl rättän ütkärelep kilä. Anı “Tatarstan xatın-qızları” ictimaği oyışması ütkärä. Piramidada uzğan tantanada “Tatarstan xatın-qızları” oyışmasınıñ citäkçese, bäygeneñ töp oyıştıruçısı Zilä Wälieva da çığış yasadı. Çarada tantanalı räweştä bäygeneñ bıyılğı ciñüçeläreneñ isemnäre ataldı. Alar mäğärif, fän, sänğät, sälämätlek, awıl xucalığı, eşmäkärlek ölkälärendä, ictimaği häm munitsipal' oyışmalarda xezmät kürsätüçe güzäl zatlar. Ämma iñ berençe nominatsiä “Xatın-qız - ana” dip atalğan ide. Küp bala üsterüçe analar bäygedä ciñü yauladı. “Xatın-qız - ana” nominatsiäsendä 14 xanım ciñde. Alarnıñ härqaysına “Melita” şirkäte tarafınnan yaxşı tunnar büläk itelde. Çistay rayonınıñ Möslim awılında yäşäwçe Alsu Xäbibullina “İñ yaxşı sıynıf uqıtuçısı” nominatsiäsendä ciñü yauladı. Alsu xanım Möslim mäktäbeneñ tatar tele häm ädäbiäte uqıtuçısı. Xäzer anı üzen tıñlap qarıyq:

Min 9nçı sıynıfnıñ uqıtuçısı. İnde 11 yıl däwamında alar belän bergä icadi yaqtan da bik aktiv eşlibez. Uzğan yılda tatar teatrınıñ 100 yıllığı uñayınnan oyıştırılğan respublika bäygesendä dä qatnaştıq. Häm iñ yuğarı proffesionallar nominatsiäsendä ciñü yauladıq. Anda uquçılarım “Berençe teatr” spektaklennän özek kürsätte.

Ciñüçelärne büläkläw cır-biyu belän aralaştırıp bardı. Şunı da äytergä kiräk, xatın-qızlar bäygese bulsa da, anda ir-atlar da qatnaştı. “Xatın-qız qaraşınnan iñ aldınğı ir-at” nominatsiäsendä Bögelmädä yäşäwçe “TNG grup” berläşmäseneñ general' direktorı Rinat Xarisov ciñü yauladı:

Xatın-qızlar bäygesenä çaqırğaç, min bik ğäcäplänep qaldım. Ämma anda ir-atlar öçen dä nomenatsiälär barlığın belgäç, menä kildem. Häm min şuşı bäyrämdä qatnaşuıma çiksez şatmın. Bezneñ başqarğan eşlärebez tatar mädäniäten üsterü belän bäyle. Bigräk tä uzğan yılda başqarğan ğämälebez öçen ğorurlanabız. Qazaqstannıñ Ural'ski şähärendä İmam Töxvätullinnıñ cimerelgän yortın torğızıp, Tuqay muzeen yasadıq. Anıñ yanına yaña yort tözep, tatar cämğiäte üzägen oyıştırdıq. Anda törle tügäräklär ütä, çaralar oyıştırıla. Tatar balaları milli sänğät'ne, tuğan telne şuşı üzäktä öyränä.

Bäygedä ciñüçelärgä qimmätle büläklär tapşırdılar. Ä Piramidağa kilgän barlıq analarğa, tutaşlarğa, qızlarğa roza çäçägen büläk ittelär.

Al'bina Zäynulla

XS
SM
MD
LG