Accessibility links

шимбә, 3 декабрь 2016, Казан вакыты 12:45

Qıtay Däwlät cır häm biü ansamble Qazanğa kiläçäk


Çınnan da, möxtäräm tıñlawçılar, 1 aprel' könne Qazanda Qıtay däwlät cır häm biü ansamble Qazanda çığış yasayaçaq. Böten dönyağa tanılğan bu törkem Könçığış, urısça äytsäk Vostok dip atala. Bu ansambl' çığışı belän Rusiädä ütkärelä torğan Qıtay yılı çaraları Qazanğa da kilep citäçäk. İnde bilgele bulğança, uzğan yıl Qıtayda Rusiä yılı ide. Ä menä 26 martta Mäskäw Kirmäne sarayında Rusiädäge Qıtay yılın räsmi açu tantanasında il başlıqları Vladimir Putin häm Xu Szın'tao da qatnaşaçaq. Şuña kürä, 1-nçe aprel'dä bulaçaq Qazandağı çarağa Qıtay xalıq respublikası başlığı üze dä kilergä bik mömkin, di qayber jurnalistlar. Qıtay yılı uñayınnan Rusiäneñ mädäniät häm kinematografiä agentlığı tırışlığı belän uzaçaq başqa çaralar da Qazanğa da kilep citäçäkme. Bu sorawnı bez Tatarstan mädäniät ministrlığınıñ mäğlümlät häm analiz bülege belgeçe Aysılu Xafizğa yulladıq.

Sentäber urtalarında Qıtay xalıqları mädäniäten häm sänğäten dönyağa tanıtuçılar utırğan, İdel buylap yözgän, teploxod Qazanda da tuqtayaçaq. Bu köymä kilgän könne başqalabıznıñ üzäk mäydannarınıñ bersendä moña qädär kürelmägän zur tamaşa bulaçaq. Anda Şaolin' monaxları, uram qurçaq teatrı, şulay uq sirkçılar häm biyuçelär dä çığış yasayaçaq. Qazannıñ mondıy tamaşanı äle berqayçan da kürgäne yuq, dip äytergä bula. Bu zur bäyrämdä qatnaşqan Qıtay rässamnarı Qazan tiräsen köymädän ük räsemgä töşeräçäk. Ä kürenekle foto-rässamnar iñ güzäl mizgellärne tarixqa terki baraçaq. Annan soñ bu eşlär Mäskäw häm Pekindağı kürgäzmälärgä quyılaçaq.

Sentäber ayında Qazan xalqı sänğät aşa Qıtaynıñ Tan dinastiäse turında da kübebräk belä alaçaq. Qıtaynıñ Sıçuan' wiläyäte opera häm balet teatrı Qazanğa kilep quyaçaq spektakl' näq Tan dinastiäsenä bağışlana.

Nail Alan

XS
SM
MD
LG