Accessibility links

дүшәмбе, 5 декабрь 2016, Казан вакыты 07:30

Tatarstanda da buşlay darularğa qıtlıq


Buşlay birelä torğan darularnı tatarstanlılar da inde berniçä ay kürgäne yuq. Uzğan yılda isä älege darular belän qıtlıq älläni küzätelmäde. Kiresençä, “tatar-inform” agentlığı mäğlümatlarına qarağanda, uzğan yılda Federal' üzäk Tatarstanğa başqa yıllar belän çağıştırğanda ikelätä kübräk darular cibärgän. Ä menä yaña yıldan respublikada invalidlarğa, moxtaclarğa buşlay birelergä tieşle darular bik az kilä başlanğan.

Älege darularnı däwlät sotsial' paket belän bergä birä. Uzğan yılda häm şulay uq bıyıl da Tatarstanda sotsial' pakettan baş tartuçılar şaqtıy küp bulğan. Küräseñ yuqqa tügelder. Bügen xätta iñ qatlawlı awırular belän integüçelär dä berniçek tä daru ala alalmıy. Menä şularnıñ berse Qazanda yäşäwçe Daniä xanım Ğalämi. Ul berençe gruppa invalidı, federal' üzäk tarafınnan darular belän tä'min itelergä tieş. Üzeneñ bügenge xäle turında Daniä xanım bolay dip söyläde:

Darularnı yaña yıldan başlap yun'läp kürgän yuq inde. Ä min bik nıq awırıym, darulardan başqa yäşi dä almıym. Şuña da xälem kisken naçarlana bara. Häm darusız qalğan ber min genä tügel! Buşlay darular alırğa tieşle barlıq tanışlarım da näq minem xäldä bügen.

Qazan daruxanäseneñ xezmätkäre buşlay darular turında bolay dip söyläde:

Yaña yıldan başlap Mäskäwdän darular bik naçar kilä başladı. Ämma iñ kiräkle - yöräk öçen, onkoawırulardan da darular bik az. Bezgä möräcäğät itkän awırularğa añlatabız inde, çiratqa yazdırıp quyabız alarnı.

Tatarstannıñ sälämätlek saqlaw ministrlıysında darular öçen cawaplı xezmätkäre belän söyläşergä küpme genä tırışsaq ta, anı totıp bulmadı. Ul yä cıyılışta buldı, yä mäşgul' äle, söyläşergä waqıtım yuq, dip belderde. Xäyer, ul Mäskäwdän darular cibärelmäwneñ säbäben añlatıp ta beterä almıydır.

Mäskäwdä düşämbe könne xökümät äğzäläre belän uzğan kiñäşmädä premyer-ministr Mixail Fradkov ildä barğan darular krizisın berniçä atna eçendä xäl itärgä kirägen belderde. Fradkov äytüenä qarağanda, älege mäsäläne östämä aqça küçerü yulı belän dä tiz genä xäl itep bulmayaçaq. Xökümät başlığı Federal' üzäk belän töbäklär arasındağı eşçänlekne tärtipkä salu kiräklegen äytte. Çönki buşlay darular belän tä'min itüne Mäskäw belän bergä töbäklär dä başqara. İnde äytkänebezçä, darular belän torğan kisken wäzğıät öçen Rusiäneñ Sälämätlekne saqlaw tarmağında küzätüçe federal' agentlığı citäkçese Rämil Xäbriev ğayıple dip tabıldı. Şulay itep, soñğı waqıtta ayıruça zur tänqit utı astında qalğan Mixail Zurabov yänä üz wazıyfasında qala alğan.

Oyıştıru mäsäläsen xäl itüne genä tügel, ä darularnı çığaru eşendä dä üzgäreşlär kiräklege xaqında äytelgän kiñäşmädä. Çönki buşlay birelä torğan darularnıñ 93%tı çit il daruları. Şuña da kiläse yıllarda iñ kiräkle darularnı üzebezdä citeşterü maqsatı quyıluı äytelde kiñäşmädä, dip yaza “Rossiyskaya gazeta” xäbärçese. Ä älegä darular yuq häm qayçan bulaçağı da bilgesez.

Al'bina Zäynulla

XS
SM
MD
LG