Accessibility links

җомга, 2 декабрь 2016, Казан вакыты 21:06

Açıq mikrofon: 8 mart könne irlär ni büläk itä, ä xatın-qızlar nindi büläk alırğa teli?


Rusiädä 8 mart xalıqara xatın-qızlar bäyräme räsmi yal köne bulğanğa, Respublikada ällä ni säyäsi çaralar da, citdi utırışlar da yuq dip äyterlek. 8 nçe martnı xalıq telendä änilär bäyräme dip yörtsälär dä, nänilär, yäşüsmer qızlar, apalar, änilär, ğomumän barça xatın-qızlar irlär qulınnan, yılğa ber tapqır, tuğan könnän qala älbättä, büläk ala torğan kön yaqınlaşa. Şunlıqtan Qazanda çäçäk bäyäläre ikelätä artqan. Göläp çäçäkläre ğädättä 60 sumnan 120 sumğa qädär bulsa, 8 nçe mart aldınnan 120 sumnan başlap 200 gä qädär kütärelgän. Yaña yılnı qarşılağandağı kebek kibetlär, bazarlar xalıq belän tulğan kön ul 8 nçe mart aldı. Xalıq fikeren beleşü näticälärenä kürä, bıyıl Rusiädäge irlär uzğan yıllar belän çağıştırğanda kübräk büläk birergä cıyına ikän.

Bu bäyrämdä irlär ni büläk itä, ä xanımnar nindi büläk alırğa teli?

Matur sawıtlar büläk itsennär ide.

Büläkneñ törlese bula inde. Ğädättä yäş buyınça barsaq, küptän tügel genä tanışqan qızlarğa yegetlär çäçäk büläk itä ala. Şulay uq inde tabın da äzerläp tä bula. Ul könne kuxnyada yegetlär genä qaynaşa. Kötep alınğan büläk bulırğa da mömkin, kem äytmeşli inä dä büläk, döyä dä büläk.

Minem öygä keçkenä genä remont yasasalar şul citä, alaysa tüşämnän su ağa.

Çäçäk birülären telär idem, çönki iñ matur büläk minemçä ul çäçäk.

Bügenge köndä xatın-qızlarğa sezneñ radio aşa berär matur cır büläk itär idem.

Xatın-qızlarğa çäçäk inde. Menä bügen bezneñ eştä ir-atlar bezgä berär çäçäk birde, ber genä çäçäk bulsa da küñellär bik kütärelde.

Miña altınnan eşlängän berär zärkän eşlänmä birsennär ide, berär beläzek, muyınsa bulsa äybät bulır ide.

8 mart bäyrämenä min üzemneñ söygän yarıma ul rok yaratqanğa kürä, min rok konsertqa biletlar aldım. Äniemä çäçäklär biräm.

Miña berär yonlı, yomşaq mäçe balası büläk itsennär ide.

Min 8 martqa üzemneñ yegetemnän qızıl rozalar büläk itep, berär kinoğa yäisä restoranğa alıp baruın telär idem.

Şaltıratıp qotlasalar, minem öçen annan da zurraq büläk bulmas ide.

Min qızlarğa bik küp çäçäk büläk itär idem.

Gölnaz Şäyxetdin

XS
SM
MD
LG