Accessibility links

җомга, 9 декабрь 2016, Казан вакыты 22:28

Tatarstan narkopolitsiäse sportta da alda


Narkopolitsiä xezmätkärläreneñ yarışları Yekaterinburgta biş kön däwamında bardı. Anda Rusiäneñ 20 töbägennän äf'yun äyläneşen tikşerüçe oyışmalarnıñ 100dän artıq xezmätkäre qatnaştılar. Alar arasında Rusiäneñ, şulay uq xalıqara sport masterları häm yäş sportsmennar da buldı.

Narkopolitsiä xezmätkärläreneñ Çempionatı Rusiädä inde berniçä yıl rättän ütkärelep kilä. Häm tatarstanlılar anda iñ aldığı urınnarda bara. Bıyıl da respublika wäkilläre çañğı yarışında berençelekne yaulap qayttı. Monıñ belän tatarstanlılarnıñ qazanışları çiklänmäde. Tübän Qamada spetsnaz yäğni maxsus törkem xezmätkäre Aliä İxsanova, ä ir-atlardan Yevgeniy Kosinsev yögereştä ciñdelär.

Xäyer, respublikada äf'yun äyläneşen tikşerüçe idärä üzeneñ töp eşçänlegendä dä sınatmıy. İdäräneñ xezmäte tağı da qatlawlıraq häm ähämiätleräk dip äytsäk yalğış bulmas. Älege oyışma wäkilläre häm alarnıñ eşçänlege xaqında tulıraq itep bezgä idäräneñ räise urınbasarı Waleriy Abdullin söyläde:

Bezdä MVD, FSBdan xezmätkärlär eşli, şulay uq salım politsiäsennän dä xezmätkärlär bar. Spetsnaz yäğni maxsus törkem bezdä bik köçle. 4 master sportı, 19 Rusiäneñ master sportı. Menä şundıy komanda bez. Uzğan yılda 100dän artıq pritonnı yuqqa çığardıq. Anda nigezdä yegetlär, ir-atlar inde. Ämma xatın-qızlar da oçrıy. Uzğan yılda ğına bez 36 kilogramm geroin aldıq. Ä bu bik küp. Yöz doza, dimäk yöz keşegä citä inde! Häm 285 kilogramm marixuana alındı.

Tatarstanda äf'yun äyläneşen tikşerüçe federal' idäräneñ räise urınbasarı Waleriy Abdullinnı işettegez, xörmätle tıñlawçılar. Ul idäräneñ xezmätkärläre, alarnıñ qazanışları turında söyläde.

Al'bina Zäynulla

XS
SM
MD
LG