Accessibility links

шимбә, 3 декабрь 2016, Казан вакыты 20:37

Däwlät Şurasında deputat xatın-qızlar 13%


Xatın-qızğa ixtiram yılına ber tapqır - 8 mart könne genä tügel, ä härdaim bulırğa tieş dip bilgelände çärşämbe könne Qazanda uzğan “İslamda xatın-qız” kiçäsendä. Şul uq waqıtta xakimiättäge güzäl zatlar isä yuğarı wazıyfalarda kübräk irlär eşli dip borçıla. TR Däwlät Şurasındağı xatın-qızlar berläşep ayırım “Ğailä, analar häm balalar” digän deputat törkeme dä oyıştırıp cibärgännär. Alar azçılıq bulğanğamı, qaysıber waqıtta ir zatlarınnan bulğan deputatlarğa caylaşırğa da turı kilä, dilär. Bu xaqta xatın-qızlardan torğan deputat törkeme äğzaları jurnalistlarğa matbuğat oçraşuı waqıtında äyttelär.

Tatarstanda yäşäwçe xatın-qızlarnıñ ber törkeme xakimiättä ürmälärgä tırışsa, ikençeläre-ayırım alğanda möslimälär kiresençä öydä utıru yağın saylıy. Bu ike törkemgä kergän xatın-qızlar da respublikada arta bara. Bügenge köndä Tatarstan Däwlät Şurasında inde xatın-qız deputatlar 13 protsentnı täşkil itä, ä berençe häm ikençe çaqırılışta alar 4 protsent qına ide.

Çärşämbe könne Tatarstan Däwlät Şurasında uzğan matbuğat oçraşuında deputatlar Rimma Ratnikova, Galina Fäxretdinova häm Valentina Lipujina xakimiättäge xatın-qıznıñ östenlekläre häm kiresençä yuğaltuları turında söylä. Valentina Lipujina isä respublikada kübräk citäkçe bulıp ir keşelärne quyalar häm bu bik ük döres tügel dide. Tatarstan Däwlät şurası räise urınbasarı Rimma Ratnikova xäzer inde xatın-qızlar arasında deputatlar artuına söyenü belderde, bezgä ir zatlarınnan torğan deputatlar bu yunäleşkä ütep kerergä mömkinlek birde, şul säbäple bez küpmeder däräcädä alar belän sanlaşırğa häm şartlarğa caylaşırğa da tieş bulabız, dide.

Uzğan yılnı xatın-qızlar ayırım Ğailä, analar häm balalar deputatlar törkeme dä oyıştırıp cibärgännär. Alarnıñ eşlägän eşläre älläni küp tügel bulıp çıqtı. Annarı yuğarı känäfigä ürmälägän sayın cämğiättä problemalar azayğan kebek toyıla bulsa kiräk. Qayçandır jurnalist bulıp eşlägän Rimma Ratnikovağa Soldat anaları komitetı eşçänlege turında soraw R. Atlas qızı:

Min jurnalist bulğanda bergäläşep eşlägän idek, küp soldatlarnı armiädän qotqarıp qaldıq. Ul komitet häm başqa oyışmalar nilär belän şöğıllänä, qanun nigezendä döres eşlilärme, äle şunı açıqlarğa kiräk.

Rimma Ratnikova süzlärenä qarağanda, ul çaqta zamanalar xärbi xezmättägelär öçen awır bulğan. Härkemgä mäğlüm, bu xäl xäzer dä üzgärmäde, kiresençä kiskenläşte genä, läkin inde deputat bularaq bu mäs'älä başqaçaraq küzallana bulsa kiräk.

Valentina Lipujina äytüençä, xatın-qız ğailä yäki eşne saylağanda, barıber närsägäder östenlek birergä mäcbür bula. Möselmannar fikerençä, xatın-qıznıñ töp burıçı ğailä uçağın saqlawda. Bäyräm uñayınnan oyıştırılğan “İslamda xatın-qız” digän çarada qazıy Röstäm Zinnurov xatın-qız barı ğailädä genä bäxetle bula ala, säyäsätne dä, eşmäkärlekne dä ul şäxsi tormışta bäxetsez bulğanğa ğına saylıy dip küplärne ğäcäpländerde. Sеr tügel, yäş möslimälär arasında da yaxşı eş tabarğa teläwçelär arta bara. Andıy tutaşlarnı xätta “Barbi-möslimälär” dip atıy.

Röstäm Zinnurov xatın-qızlarnıñ küp probleması üzlärenä zur burıçlar aludan tua, ä bu möslimälärgä xas bulmasqa tieş dip bilgeläde, xezmättän arıp qaytqan xatın-qızn öydä dä cigelep eşlärgä tieş, şul säbäple sälämätleklärenä zıyan kilä dip assızıqladı. Monda berençe çiratta irlär ğayıple dide ul. Qazıy xatın-qızlarnıñ küplärendä kükräk şeşe yoqıları tuymawdan kilep çığa häm bu inde isbatlandı dip belderde.

Xatın-qızlar bäyräme uñayınnan oyıştırılğan ike çara da güzäl zatlarnıñ ni qädär törle buluın kürsätte. Häm äytergä kiräk, bu küreneş respublikada köçäyä genä bara.

Landış Xarrasova

XS
SM
MD
LG