Accessibility links

шимбә, 10 декабрь 2016, Казан вакыты 17:38

Tatarstanlılarnı qurqınıç xärbi büleklärgä cibärerlärme?


Yanında añlawçı, teräk bulırday söygän keşese häm balaları bulğanda xatın qız bäxetle. Ämma şuşı bäxetne çelpärämä kiterü awır tügel. Yäp-yäş yegetlär xärbi xezmätkä kitep, äylänep qaytmağan oçraqlar azmı? Soñğı aralarda mondıy ayanıçlı oçraqlarnıñ yışayıp kitüe citäkçelärne dä borçuğa saldı. Tatarstan premyer-ministrınıñ berençe urınbasarı Rawil Moratov quşuı buyınça Qazanda Rusiädäge tärtip bozıla torğan büleklärneñ isemlege tözelde. Älege “qara isemlekkä” Rusiäneñ törle poçmaqlarında urnaşqan 9 xärbi bülek kertelgän. Anda Tatarstan xärbiläre cäberlängän, ülem xälenä kiterelgän oçraqlar terkälgän. Rawil Moratov - tärtip bulmağan xärbi büleklärgä bez üzebezneñ yegetlärne cibärä almıybız dip belderde.

Ämma Federal' Üzäk Tatarstannıñ bu telägen kisken tänqitläp çıqtı. Rusiä Federatsiäse Şurasınıñ saqlanu häm iminlek komitetı räise Viktor Ozerov Rawil Moratovqa atap, Tatarstandağı räsmi Rusiädä xärbi köçlärne tuplaw eksterritorial' prinsip nigezendä buluın onıtqan ikän, däwlät xezmätendä aña urın yuq dip beldergän. Kemne qaya xezmätkä cibärüne federal' üzäk kenä xäl itä, dide Viktor Ozerov. Mäğlümat çaralarına saqlanu ministrlığı wäkilläre bu turıda - ildä qanun bar häm anı xörmät itü kiräklegen äyttelär. Ägär dä respublika citäkçelegendä xärbilärneñ xoquqları bozılu faktları bar ikän, ğayıplelär belän xärbi prokuratura şöğellänergä tieş, dide ministrlıq wäkilläre.

Ä xäzer “Agora” töbäkara xoquq yaqlaw assotsiatsiäneñ citäkçese Pawil Çikovnıñ fikeren tıñlap kitik:

Rusiädäge qanun buyınça barlıq töbäklärdäge yegetlärneñ dä xezmät itü öçen urınnı saylaw mömkinlege yuq. Ämma Tatarstannıñ federal' qanunğa qarşı kilü teläge yuq ide. Respublika citäkçeläreneñ maqsatı tatarstanlılarnı şikle xärbi büleklärdäge wäxşileklärdän saqlap qalırğa ğına tırışu. İnde Rusiäneñ Saqlanu ministrlığı wäkilläre öçen dä andıy xärbi büleklärneñ barlığı ser tügel. Qazan xoquqçıları älege büleklärneñ isemlegen tözep, bu büleklärgä yegetlärne cibärü-cibärmäw mäs’äläsen respublika Federal' üzäk belän bergä xäl itä alır ide. Monda bernindi qanun da bozılmıy. Tağın şunı da äytä alam, Rusiä Konstitutsiäsendä keşeneñ xoquqların yaqlaw mäs’äläsen Federal' üzäk häm töbäk ikese bergä xäl itärgä tieş. Bu oçraqta süz yäş yegetlärneñ xoquqları turında bara. Köç qullanuğa duçar bulırğa telämägän yäş keşelär turında.

Al'bina Zäynulla

XS
SM
MD
LG