Accessibility links

җомга, 2 декабрь 2016, Казан вакыты 21:00

Teläçelelär kürenekle yaqtaşları belän oçraştı


Rayon xakimiäte başlığı urınbasarı Fidail Mortazin Teläçäge kilep töşügä ük, Azatlıqnıñ Yaña ğasır radiosında waqıtı qısqaruğa rizasızlığın belderep, bezneñ rayon xalqınıñ, cir xezmätendägelärneñ iñ yaratıp tıñlıy torğan, iñ küp xäbär ala torğan radiosı bit ul, dip östäde. Xakimiät wäkile süzlärenä qarağanda alar aydarlılarnıñ Tatarstan prezidentı Mintimer Şäymievkä yazğan üteneçläre turında da xäbärdar. İnde cir keşese, awıl keşese digännän, 8-nçe mart könne rayon üzägendäge mädäniät yortında ütkän kiçädä rayon başlığı İldar Nizamov iñ başta barsı da 20 şär yıl häm annan da kübebräk terlekçe häm sawımçı bulıp eşlägän, şul uq waqıtta 5 bala da tärbiäläp üstergän 5 xatın-qızğa Ana danı medale tapşırdı. Teläçelelär Tatarstan tarixında berençe tapqır üz rayonnarınnan çıqqan kürenekle cırçılarnı, sänğät ostaların bergä cıyıp awıllardan xatın-qızlarnı çaqırıp bäyräm ütkärde. 4 säğätkä yaqın barğan tamaşada çığış yasawçılar arasında äle cır, teatr dönyasına yaña ayaq basıp kilgän yäşlär dä, tatar estradasında uz urının tapqan Räsim Nizamov, çit il säxnälären dä üz itkän opera cırçısı Venera Gänieva da bar ide.

Min bügen räxätlänep Teläçemä qayttım. Min üzemneñ teläçem dip, min Teläçe qızı dip äytäm. Çönki äti-äniem çığışları belän Teläçe yağınnan. Äniem Subaş awılınnan, ätiem Keçe Mirätäk-Biçer awılınnan. Bala çağım böten kanikullar da şuşında uzdı. Räxätlänep qayttım bügen yaqtaşlarımnı qotlarğa. Konsertta bit Rabiğa Sibgatullina, Färit Xatipov, Aygöl Bariewa, Alinä Säfiullina… Küpme talantlar. Niçek inde mondıy oçraşuğa qaytmıysıñ… Min xäterlämim şulay artistlar bergä cıyılıp bäyräm könendä tuğan yaqlarına qaytu ul berençe tapqırdır mögäyen. Bu zur waqiğa.

di Tatarstannıñ häm Rusiäneñ xalıq artistkası Venera Gäniewa. Ä cırçı Aygöl Bariewanıñ Teläçe yaqlarına iseme tanılğaç täwge qaytuı ikän.

Berençe tapqır Teläçegä yaqtaşlarım bularaq qayttım. Moña qadär gel Sabağa ğına qaytırğa turı kilde. Ätiem Saba yağınnan, ä äniem Teläçedän İske Cöri awılınnan. İnde nihayät mine Teläçegä dä çaqırdılar.

-Teläçegä küñel kübebräk tartamı, ällä Sabağamı?

-İkese dä miña bik yaqın. Çönki minem bala ağım Teläçedä ütte. Ä inde yäşlegem Sabada ütte. Teläçene ayırıp bulmıy sabadan. 15 yıl elek Teläçe Saba rayonına kergän. Bik küp awıllar Saba rayonınnan çıqqan. Çikläre bulsa da, isemnäre törle bulsa da, barıber şul ber ük keşelär, ber ük cırçılar, ber ük icat keşeläre çıqqan. Şuña kürä ber rayon inde ul minem öçen.

Monnan 15 yıl elek isä Teläçe häm Saba rayonı ber ide. Qazan şähärennän 80 çaqırım yıraqlıqtağı bu rayon Sabadan ayırılıp, quş tırnaqlar eçendä äytkändä, başqa çıqqan waqıtta, 52 awılnı üz eçenä ala. Bügenge köndä anda 15 meñgä yaqın keşe yäşi. Äle yaña ğına rayonnıñ töbäkne öyränü muzeyın açqannar. Rayonnıñ mädäniät bülege mödire Daut İxsanov äytüençä, teläçelelär tarixqa da ixtiram belän qarıy, bügen kürenekle yaqtaşları belän dä ğorurlana. Bu xaqta rayonnıñ 15 yıllığına basılğan “Teläçe yoldızlığı” digän xäyran qalın ğına kitap ta söyli.

Uyıbızda bar ide şul uq xakimiät başlığı belän söyläşkändä dä, rayonıbıznıñ 15 yıllığına cıyılğanda da üzebezneñ yaqtaşlarıbız belän oçraşıp, änilärebezne täbriklärbez dip. Yıraq Tömän ölkäsennän ük qaytqannar. Bez çiksez räxmätle alarğa.

dide mädäniät bülege mödire. Teläçelelär dä, bu oçraşuğa qaytqannar da mondıy çaranı yıl da ütkärergä kiräk dip taralıştı.

Nail Alan.

XS
SM
MD
LG