Accessibility links

җомга, 9 декабрь 2016, Казан вакыты 18:39

Tatarstanda narkomaniä belän köräş niçek bara?


Äf'yungä qarşı köräş alıp barğanda tabiplar, türälär, jurnalistlar, din ähelläre, ictimaği oyışma wäkilläre bergä tuplanıp eş itkändä genä uñışlarğa ireşep bula. Tatarstannıñ bu eştä täcribäse bar. Däwlät häm ictimaği oyışmalarnı respublikanıñ İminlek Şurasınıñ tarmakara komissiäse berläşterep tora. Tatarstannıñ äf'yungä qarşı köräşkä bağışlanğan däwlät programmaları Rusiädä iñ köçlelärdän sanala. Soñğı biş yılda respublikada narkomaniä üseşe berniçä tapqırğa kimede. Ämma älegä bu ölkädä problemalar şaqtıy küp qala. Çärşämbe könne Qazanda ütkän tarmakara komissiäseneñ utırışında süz şul xaqta bardı. Narkomaniäneñ üseşe kimesä dä, belgeçlär tınıçlanırğa urın yuq dip sanıy. Respublika narkologiä dispanserı baş tabibınıñ urınbasarı Gabbäs Töxvätullin söyli:

Bügenge köndä 8.200gä yaqın keşe narkomaniä diagnozı belän xisapta tora. Ämma bu sannarğa ışanıç az. Çönki bilgele bulmağan narkomannar tağı da kübräk. 10 tapqırğa kübräk.

Äf'yun qullanuçılar nigezdä 25-29 yäşlärdä. Yäşüsmerlär arasında narkotik matdälärne qullanu kimegän. Ämma bik borçulı rayonnar, şähärlär dä bar. Şularnıñ berse Älmät. Tarmakara komissiäneñ utırışında Älmät şähärendä narkomannar sanı kisken artuı turında äytelde. Utırışta monıñ qayber säbäpläre dä açıqlandı. Şähärdä äf'yun belän köräşü bik sülpän bara. Älmättäge tarmakara komissiäse başlığı alışınuı da wäzğıätne üzgärtmägän. Häm iñ qızğanıçı - kiläçäkkä dä nindi dä bulsa üzgäreşlärgä ömet az anda. Tatarstannıñ tarmakara komissiäseneñ citäkçese Zilä Wälieva tarafınnan älege bitaraflıq bik nıq tänqitlände. Monnan tış narkomaniä üseşe Tübän Qama rayonında da şaqtıy zur buluı açıqlandı.

Tatarstan buyınça äf'yunnän ülüçelär sanı arta. Uzğan yılda ğına 400 keşe dönya quyğan. Häm yäşlär arasında ütkärelgän soraştıru nigezendä şul açıqlandı, yäşlärneñ yartısı respublikada äf'yun tabuı awır tügel dip sanıy. Şundıy cawaplar bulğanda, älbättä, tınıçlanırğa urın yuq.

Al'bina Zäynulla

XS
SM
MD
LG