Accessibility links

җомга, 9 декабрь 2016, Казан вакыты 20:23

Qabulda yänä ber şartlaw


Bügen Qabül üzägendä darı häm qoral kiräk-yaraqları saqlagıçında bulğan şartlaw näticäsendä 6 keşe ülde, berniçäse yaralandı. Şartlaw tirä-yündäge qayber yortlarnı häm kibetlärne dä cimerelde. Başta terror ğamäle dip belderelgän bulsa, sonınnañ politsiä monıñ qoral saqlağıçındağı kiräk-yaraqlarğa ut qabu säbäbçe buluwın açıqladı. Bu waqıyğa yaña intihar höcümnären kötep qurqıp yäşägän, Afğan başqalası xalqın yañadan borçuğa saldı.

Qabulnıñ iske-şähär üzägendä bulgan älege şartlaw tirä-yünne tuzan bolıtına kümde, anıñ köçe 1 çaqrım tirälektä täräzä piyalaların çälpärämä kiterde.

Afğan Politsiası häm İminlek wäkilläre zararnı açıqlap, soñgı näticälärgä qaraganda 6 keşeneñ hälak buluın, 9-ınıñ yaralanuın xäbär itte.

Politsiä belderüençä, ülgännär sanı arta ala, şartlaw urınında äle haman da çistartu eşläre alıp barıla ikän.

Ütkän yılnı Qabul bik küp tapqır terror höcümnärennän intekkän ide, şular näticäsendä anda distälägän keşe ülde. Prezident Xämit Qarzaynıñ xakimiätenä qarşı köräş alıp barğan Taliban ğisyançıları şundiy höcümnärneñ bıyıl da däwam itäçäge belän kisätep tora.

İnde äytelgänçä, soñğı şartlawnıñ säbäben politsiä awçı qoral häm şuña kiräk-yaraqlar sata torgan ber kibettä darı häm dinamitlärneñ yalğış şartlawı belän añlata.

Şartlawlarda ike tuganın yugaltqan, Xaci Qudbuddin xäbärçelärgä bulay dip söyläde:

"Minem ike tuğanım şartlawda hälak buldı, aña närsäneñ säbäb bulganıñ belmibez, bik qurqınıç häm zur şartlaw ide. Närsäneñ şuña säbäbçe bulganıñ xoday üze gena beläder", dide şartlawda tuğannarın yuğaltqan äfğanlı.

AFP belderüençä, şartlaw urınında 3 metrlıq çoqır xasil bulğan, tirä-yüngä saqlağıçtağı qoral häm mıltıqlar taralğan.

Kibetneñ xucası şul ülgännär arasındadır dip farazlana. Şul xätle darınıñ häm dinamitnıñ nigä şul kibettä saqlanganı añlaşılıp betmägän, läkin isemen açıqlanuwın telämägän ber politsiä xezmätkäre, şul materiallarnıñ qanunsuz qazu eşlärendä qullanılğanın belderde.
XS
SM
MD
LG