Accessibility links

сишәмбе, 6 декабрь 2016, Казан вакыты 19:15

Başqortstanda Ğalimcan İbrahimovnı iskä alalar


Atnakiç könne Ufada tatar xalqınıñ mäşhür yazuçısı Ğalimcan İbrahimovnıñ tuuına 120 yıl tuluğa bağışlanğan mädäni çaralar başlanıp kitte. İke kön däwam itäçäk bixisap çaralarda qatnaşu öçen Başqortstanğa Qazannan da baytaq qunaqlar kilde. Akademik Mirfatıyx Zäkiev, fän doktorı Ramil İslamov, filologiä fännäre doktorı Kim Miñnullin häm başqa kürenekle şäxeslär qatnaşa anda.



Täwge zur çara – Ğalimcan İbrahimovnıñ tuuına 120 yıl tulağa bağışlanğan fänni-ğamäli konferensiä Ufada Miftaxetdin Aqmulla isemendäge Başqort däwlät pedagogiä universitetında ütte. Älege cıyınnı universitet rektorı Rail Äsädullin açtı häm kereş süz belän çığış yasap, Ğ. İbrahimovnıñ şäxese turında mäğlümatlar birde.



Annan soñ süz Ğalimcan İbrahimovnıñ icatın häm tormışın töple öyrängän häm anıñ xaqında öç romannan torğan trilogiä yazğan zur ğalim häm yazuçı Sufiän Povarisovqa birelde. Aqsaqal ğalim häm ädip bu trilogiäne yazuğa üze 70 yäştän ütkäç kereşä. Şundıy ölkän yäştä buluına qaramastan, öç kitaptan torğan äsärne yazıp beterä ul. Avtor üzeneñ menä şul trilogiäne yazuı tarixı turında söyläp, Ğalimcan İbrahimovnıñ tormışı häm icatı üzençälekläre xaqında äytte. Ğalimcan İbrahimovnı “tatar ädäbiätınıñ päygambäre” dip atadı ul.



Fänni-ğamäli konferensiädä artaban süz Qazannan kilgän tanılğan ğalim, akademik Mirfatıyx Zäkievqa birelde. Ul Ğalimcan İbrahimovnıñ talantlı ädip kenä tügel, ä tatar xalqınıñ kürenekle cämäğät eşleklese buluın da assızıqladı. “1915-1916 yıllarda uq G. İbrahimov cämğıättäge qatalulı şartlarda tatar xalqı yazmışı turında qayğırta”, - dide M. Zäkiev.



Ğalimcan İbrahimovqa bağışlanğan cıyında anıñ icatın şulay uq töple öyrängän ğalim Sufiän Safuanov ta çığış yasadı. Anıñ notığı “Ğalimcan İbrahimov häm Başqortstan” digän temağa ide. Çığış yasawçı fikerençä, Ğalimcan İbrahimov üze tumışı belän Başqortstannan bulğaç, qayda ğına yäşäsä dä, qayda ğına säfärdä yörsä dä, Başqortstanda barğan xäl-waqiğalar belän härdaim qızıqsınıp tordı. “Ğalimcan İbrahimov respublikada yäşäwçe tatarlar häm başqortlarnıñ üzbilgeläneşe xaqında fikerlären törle oçraşularda äytä kilde, tatar häm başqortnıñ ädäbi tele turında eşlekle täqdimnäre belän urtaqlaştı”, - di Sufiän Safuanov.



Fänni-ğamäli konferensiädä Başqortstan Yazuçılar berlege idäräse räise, xalıq şağire Rawil Bikbaev ta çığış yasadı. Başqortstanda tuıp üskän Ğalimcan İbrahimov ike tuğandaş xalıq – tatar belän başqortnıñ ğömer-ğomergä dus häm tatu yäşäwen üz äsärlärendä dä, publitsistik yazmalarında da surätläde, - dide R. Bikbaev. – Häm menä şul duslıqnı saqlaw öçen can attı”.



Cıyında çığış yasağan ğalimnär Zöfär Rämiev belän Räif Ämirov Ğalimcan İbrahimovnıñ ädäbi tel baylığı, tel üzençälekläre xaqında qızıqlı mäğlümatlar birde.



Tatarstannıñ Ğ. İbrahimov isemendäge Tel, ädäbiät häm sänğät institutı direktorı, fän doktorı Kim Miñnullin Tatarstanda Ğ. İbrahimovnıñ 120 yıllığı uñayınnan başlanğan çaralar xaqında söyläde, Başqortstan däwlät pedagogiä universitetına istälekle büläklären häm baytaq kitaplar tapşırdı. Qazannan kilgän fän doktorı Ramil İslamov Başqortstannıñ berniçä ğalimenä kandidatlıq dissertatsiälären yaqlağanlıqqa tanıqlıqlar tapşırdı. Alar kandidatlıqların Qazanda yaqlağan.



Fänni konferensiädä M. Ğafuri isemendäge cämäğät fondı räise Lyutsiä Kamayıva küñelle xäbär äytte. Qazan ğalime Zöfär Rämievqa M. Ğafuri isemendäge medal'ne tapşırdı ul. Zöfär Rämiev Mäcit Ğafurinıñ 4 tomlığın çığaruğa zur öleş kertkän.



Ğalimcan İbrahimovnıñ 120 yıllığına bağışlanğan çaralarda qatnaşuçılar, şul isäptän Qazannan kilgän qunaqlar da, comğa könne Awırğazı rayonına häm

Stärletamak şähärenä bara. Anda da baytaq çaralar qaralğan.

Fänis Fätxi, Ufa

XS
SM
MD
LG