Accessibility links

дүшәмбе, 5 декабрь 2016, Казан вакыты 19:34

[ xalıq awazı ] Mikolaev tatarları oçraştı



Ukrainanıñ Mikolaev şähärendä tatarlarınıñ çirattağı oçraşuları matur yazğı bäyräm – 8 martqa bağışlandı. Ul äzräk kiçekterelep, 11 martta ütte, säbäbe bik ğadi – uqıtuçılar yortınıñ zalın telägän waqıtta alırğa abruyıbız citmi şul.

Oçraşu Tatar mädäniäte oyışması räise Änäs abıy Säxäbievneñ täbrik suzläre häm cämğiät tormışınnan xäbärlär belän başlanıp kitte. Urınlı bulır äytep kitergä - Änäs abıy xalıq artistı, cırçı Rafael Säxäbievneñ ber tuğan abıysı.

Bäyräm kiçäse bulsa da, oçraşuda säyäsi-ictimaği mäsälälär dä kütärelde. 8 mart bäyrämeneñ tarixına tuqtalğaç, üz çığışımda Tatarstandağı säyäsi wäzğiätkä qısqa ğına küzätü yasadım.

Nişliseñ bit, soñğı waqıtta ber yulı öç tiskäre waqiğa turı kilde. Berençese – Tatarstan belän Rusiä arasında tözelgän Şartnamäneñ ayanıç yazmışı.

İkençese, älbättä, Azatlıq awazınıñ Yaña Ğasırdan kitüe. Mikolaev tatarları da Azatlıqnıñ küp sanlı tıñlauçıları täläbenä quşıla. Läkin optimizmğa urın yuq şikelle. Saylawlar yılında mäğlümät çaraların awızlıqlaw tırışlığı köçäyä genä barır sıman.

Ber uñaydan Azatlıqnı tıñlau täcribäm belän dä urtaqlaştım. Äytergä kiräk, Mikolaevta xäzer Azatlıq qısqa dulqınnarda şaqtıy äybät işetelä, bigräk tä irtänge tapşırular.

Öçençe tiskäre äyber – Tatarstan xökümäteneñ yäş yegetlärebezne qurqınıç xärbi büleklärdän saqlap qalu niätenä Federal üzäkneñ şaqtıy tupas häm adekvat bulmağan reaksiäse. Härkemgä añlaşıla inde, Rawil Moratov adımnarı Räsäy xärbi köçlären eksterritorial printsipta tuplaunı cimerüdän yıraq tora.

Konsertnı, ğädättägeçä, oyışmabıznıñ särqätibe Mägäfirä apa Yaqupova alıp bardı. Kontsertqa näni artislarıbız da Mägäfirä apa cıtäkçelegendä bik tırışıp äzerlängän ide. Milli külmäk häm matur qalfaq kigän 3-çe klassta uquçı Veronika Basarab «Äpipäne» cırlap ta biep tä kürsätkäç käeflär gel kütärelep kitte.

Kiläse yılda mäktäpkä kerergä cıyınğan Nailä Saxabieva başqaruında Tuqaynıñ «Tuğan tel» şiğere cıyılışıbızğa milli rux östäp cibärde.

Tatar dönyasında ütkän yıl Ğabdulla Tuqay yılı, ä 2007 yıl -Ğalimcan İbrahimov yılı dip iğlan itelüen istä totıp, kiläse oçraşuıbıznı Ğabdulla Tuqay häm Ğalimcan İbrahimovqa bağışlarğa buldıq.

Azatlıq öçen Mikolaevtan Şamil İxsanov.

Räsemdä: Veronika Basarab (sulda) häm Nailä Saxabieva.


[ xalıq awazı ] säxifäsenä bu yazmanı Azatlıqnıñ küptänge dustı Şamil äfände İxsanov äzerläp cibärde. Ägär sezneñ dä üz töbägegezdä bulğan xäl-waqiğalar turında bezgä xäbär itäsegez kilsä, räxim itegez, bezneñ adres: azatliq(at)rferl.org


XS
SM
MD
LG