Accessibility links

Кайнар хәбәр

Ufada “Tuğan tel” cır bäygesenä äzerlek bara


Ufada kiläse atna azağında “Tuğan tel - 2007” tatar cırı bäygeseneñ yomğaqlaw öleşe ütäçäk. Äle bu bäygegä rayonnarda häm şähärlärdä saylap alu turları ütkän. Bäygeneñ Ufada ütäçäk yomğaqlaw öleşenä illedän artıq yäş başqaruçı ğariza birgän. “Tuğan tel” tatar başqaruçıları bäygesendä, härwaqıttağıça, üzeşçän cırçılar qatnaşaçaq. Alar 16 yäştän 35 yäşkä qädär aralıqta bulırğa tieş.



Şuşı bäygegä äzerlekne oyıştıru komitetı räise, Bötendönya Tatar kongressınıñ Başqortstandağı daimi wäkile, tanılğan kompozitor Alik Lokmanov comğa könne şuşı bäygegä äzerlek mäs’älälären tikşergän utırış ütkärde. Anda tatar cırı bäygesendä qatnaşuçılarğa bäya biräçäk jyuri äğzaları qatnaştı.



Alik Lokmanov “Tuğan tel – 2007” tatar cırı bäygesenä äzerlekneñ bik awır baruın äytte. Anıñ säbäbe aqça citmäw ikän. Alik äfände äytüençä, Başqortstan Mädäniät häm milli säyäsät ministrlığı bu sänğät yarışmasın uzdırırğa başta 75 meñ sum aqça bülgän bulğan. “Ämma şuşı bik küp bulmağan aqçanı da oyıştıru komitetı ala almadı, - di Alik äfände. – Çönki anıñ yartısın respublikadağı başqa mädäni çaralarğa bülgäläp betergännär. Xäzer tatar cırı bäygesenä nibarı 32 meñ aqça torıp qalğan”, - dip ärneşte Alik Lokmanov.



Şul uq waqıtta Alik Lokmanov äytüençä, yañaraq Mäçetle rayonında başqort milli oyışmaları äzerläp ütkärgän Qubız bäyräme öçen Mädäniät ministrlığı 600 meñ sum aqça bülgän bulğan. “Haman da millät ayıralar, tatarnı niçek kenä bulsa da , qısalar, - dide Alik Lokmanov. - Xäzer tatar cırı bäygesen oyıştıruçılar bu matur bäyrämne özmäs öçen, tatar eşquarlarına möräcäğät itep, az bulsa da aqça tuplarğa tırışa”.

Fänis Fätxi, Ufa

XS
SM
MD
LG