Çın ir-yeget bulu öçen armiägä kitärgä aşqınuçılar yıldan-yıl kimi bara. Zamanalar üzgärä, keşelärneñ armiägä qarata mönäsäbäte dä. Dedovşçina - yäş xärbilärne kimsetü çäçäk atqan armiägä üz rizalığı belän kitärgä teläwçelär älläni küp tügel. Xezmättän qaçuçılar yıldan-yıl arta bara, di belgeçlär.
Ä kiläse yıldan Rusiä prezidentı qararı belän xezmät waqıtı ike tapqırğa kimeteläçäk. Şul nisbättän bıyılğı yazğı çaqırılışta armiädän qaçuçılar sanı tağı da artaçaq dip farazlıy belgeçlär. Busı inde yegetlärneñ “artığın” xezmät itärgä telämäwe belän bäyle. Çönki yaz könne armiägä kitäçäk yegetlär äle yıl yarım xezmät itärgä tieş bulaçaq.
Tatarstan voenkomatı isä yazğı çaqırılışqa da optimistik qaraşta tora. Bilgele, tatarstanlılar da xezmättän qaça, ütkän közdä genä, mäsälän, 480 keşe xezmättän qaçıp qalğan. 4 meñ yeget isä xärbi burıçın ütärgä kitkän. Yazğı çaqırılışta da qaçuçılar sanı älläni artmas digän fikerdä toralar. Tatarstan voenkomatınıñ xezmätkäre Fänis Ğarifullin belderüençä, xäzer alarnıñ iğtibarı üzägendä yuğarı hönäri uqu yortların tämamlağan yegetlär. Xäzer kübräk şundıy yegetlärne xezmätkä alaçaqlar. Ä alarnıñ şaqtıyı qaçıp yöri. Şuña da xezmättän qaçuçılarnı şähär, rayon, awıllardan ezläw eşlären alıp baralar.
Xärbi xezmätne ber yılğa qaldırunıñ uñay häm tiskäre yaqları turında sorağaç, Fänis Ğarifullin anıñ tiskäre yaqları turında ğına äytte:
Minemçä, ber yıl eçendä yegetlärne xärbi yaqtan tieşleçä äzerläw mömkin tügel. Dedovşçina - babayçılıqnıñ barlığın min inqayr itmim. Ämma ul bit böten xärbi büleklärdä dä yuq. Ä döresen äytkändä, babayçılıq cämğiät belän tığız bäylängän. Cämğiät nindi, armiä dä şundıy.Kontrakt xezmätkä östenlek birelü säbäple Rusiädä xärbi xezmätne ber yılğa qaldıru mömkinlege tuğan. Bügenge köndä kontrakt buyınça xezmät itüçelär armiä häm flotta 70 %nı täşkil itälär. Ämma xezmät waqıtı kimegäç, armiägä kitärgä tieşle yegetlär sanı da ikelätä artaçaq bulıp çığa. Xäzer Rusiädä 350 meñ keşe xezmätkä çaqırılsa, kiläse yıldan 700 meñ bulaçaq. Xärbi çaqırılışlar sanı da artırğa mömkin - ike tapqır urınına, yılğa dürt tapqır xärbi xezmätkä alıp kitüläre bar, dip yaza “Rossiyskaya gazeta” xäbärçese.
Bilgele, Rusiägä saqlawçılar kiräk, ämma armiädän imgänep qaytqan yeget çın vatanpärvär bulıp citärme? Häm babayçılıq mäs’äläsendä cämğiätne ğayıpläwdän tuqtap, armiä üze şul cämğiätkä ürnäk kürsäter waqıt küptän citte.
Al'bina Zäynulla
