Accessibility links

сишәмбе, 6 декабрь 2016, Казан вакыты 20:57

Çallı piketqa äzerlänä


Çallı TİÜe cıyınında "Azatlıq" radiosına qağılışlı mäs'älälär soñğı waqıtlarda kübräk kütärelä başladı. Biredä törle dairälärgä möräcäğätlär qabul itelep cibärelüe xaqında äytelde. Xäzer menä monda yaña çaralarğa äzerlek bara. Yaña çaralar digännän, aları ni belän bäyle soñ? İctimaği Üzäk räise R.Kaşapov äytüençä, monda "Azatlıq" radiosı tapşıruların elekke sistemağa qaytaru buyınça piketlar oyıştıru, imzalar cıyu häm başqa çaralar qaralğan. Ni öçen şuşındıy adımnarğa barırğa bulğannar? Şähär İctimaği Üzäge räise R.Kaşapov qayber säbäplär xaqında bolay di:

"Ütkän düşämbe TİÜneñ xalıq cıyınında belderü belän çıqtıq häm 25 mart könne qarşılıq aksiäse ütkärü turında qarar qabul ittek. Piket oyıştırunıñ töp säbäbe - Azatlıq radiosı tapşırularınıñ diapazonı azayu näticäsendä bezgä möräcäğät itüçelär kübäyde. Bezgä Çallıdan da, yaqın-tirä rayon-şähärlärdän, Başqortstannan çıqtılar häm "Azatlıq" radiosın yaqlap nindi dä bulsa ğamällär qılsağız ide, dilär. İñ başta 25 martta piket ütkärergä isäplibez, annan soñ radiotapşırularnı torğızunı taläp itep imzalar cıyu qaralğan. Şulay uq däwlät citäkçelärenä, xoquq-orğannarına xatlar belän çığarğa uylıybız. Bu çaralar da yärdäm itmäsä, Ewropa Şurasına möräcäğät itäçäkbez. Berdänber bäysez, dingä, millätkä, säyäsätkä qağılışlı mäs’älälärne tatar-başqort tellärendä kütärüçe "Azatlıq" radiosın yaqlap çığarğa tieşbez. Kiläçäktä şuşı radionı yaqlap böten tatar-başqort dönyası üz süzen äyter dip uylıym".

R.Kaşapov äytüençä, älege piketnı Çallı TİÜe isemennän ütkärergä röxsät birelmägän. Şunlıqtan Räfis Kaşapov älege qarşılıq aksiäsen şäxsän üz isemennän, yäğni "Azatlıq" radiosı tapşıruların tıñlawçı bularaq ütkärergä bulğan. Anıñ bu adımın şähärdäge başqa milli oyışmalar aktivistları da xuplağan häm teläktäşlek kürsätergä kileşkännär. Kaşapov belderüençä, şäxsi qarşılıq aksiäsenä kirtä quyuçılar yuq ikän.

Çallı, Ğafiulla Ğaziz

XS
SM
MD
LG