Accessibility links

чәршәмбе, 7 декабрь 2016, Казан вакыты 23:33

Eurovision bäygese 42 ilgä qädär kiñäyde


Xäzer, maynıñ 12sendä bulası 52nçe “Eurovision Eurovision Song Contest” bäygesenä äzerlekneñ qızğan çağı. Anda qatnaşuçı illär üz wäkillären saylaw belän mäşğül. Soñğı yıllarda bäygegä Könçığış Yevropa, Kavkaz däwlätläre dä quşıldı. Küp keşe bäygene kire qaqsa da, Yevrovidenie cır bäygese yıldan yıl üsä bara. Bıyıl anda qatnaşuçı illärneñ sanı moña qädär bulmağan däräcägä – 42 ilgä qädär üste.

Yevrovidenie tağın şunısı belän dä qızıqlı – bäygedä qatnaşuçı il wäkilläre öçen başqa illär tawış birä. Kürşelärneñ niçek tawış birüe säyästçelärneñ iğtibarın cälep itä.

Verka Serduçka iseme astında tanılğan cırçı Yevrovideniedä Ukraina isemennän çığış yasarğa ciyına. Säxnädän mäzäk söyläşüçe häm şayan cırlar başqaruçı Verka Serduçka tawış birü näticendä saylap alındı. Yevrovidenie bäygesen tänkitläwçelär, bäygeneñ däräcäse töşä bara, pop mädäniät, ğadiräk cırlar, şaqqatıra torğan kiem alğaraq çığa, di. 2004 yılda Ruslana kün qısqa çalbar kiep häm çıbırqı şartlatıp ciñü yawlasa, ütkän yıl , bäygedä Lordi isemle qurqnıç cen-pärilär bulıp kiengän Finländiä törkeme ciñde.

Belğeçlär, Yevrovidenie xäzer cır bäygese bulıp qına qalmıy, başqa törle tamaşağa äwerelä bara, di. Muzıka belğeçe Yurko Zeleny isäpläwençä, artislar närsä beländer aldıru turında uylarğa tieş. Qatnaşuçılar bäygegä küñel açu öçen genä bara, di ul. Irlandiä wäkile Keith Mills anıñ belän kileşmäs ide. Anıñ fikerençä bäyge küñel räxätlegen birä häm anıñ Kavkaz häm Könçığış Yevropa yärdämendä kiñäyüe törlelek alıp kilde. Könçığış Yevropada törle häm qatlawlı stillärdä eşläwçe artislar bar, di ul.

Yevrovidenie bäygese ul pop muzıka yärminkäse genä tügel, ul äle zur aqçalar da. Bäygeneñ budjetı 20 million dollarnı täşkil itä. Keçkenä illär öçen bu bik möhim, çönki üz mädäniäten kürsätü belän bergä, alar Yevrovidenie aşa turistlarnı da cälep itä ala.

Yevrovidenie xäzer üsä bara. Bäygeneñ başqarma çitäkçese Svante Stockselius äytkänçä, bäygeneñ populyarlığı, qatnaşuçı illärneñ sanı artuı belän bergä üsä barğan. Ütkän yılğı tamaşanı mäsälän 100 meñ keşe qarağan.

Yevrovidenie İkençe dönya suğışınnan soñ barlıqqa kilä. Berençe bäyge 1956 yılda Şvetsariädä ütkärelgän. Ul waqıtta anda 7 genä il qatnaşqan. Yevrovidenie iseme bik uk döres tügel, çönki Yevropada bulmağan illär da bäygedä qatnaşa ala. Bäygedä qantaşu şartı bulıp, ildege televidenie şirkäteneñ Yevropa tapşırular alıp baru Berlegenä kerüe tora. Anda Kavkaz, Tönyaq Amerika häm qayber Yaqın Könğış illäre dä kerä.

Biredä säyäsät tä bar, İzrailneñ bıyıl bäygegä cibärgän cırı "Push the Button" "Töymägä bas" cırı inde şaw-şu kiterep çığardı. Anda İran, atom häm suğış yaqlı prezidentlarğa işärlär bar.

Yevrovidenie, kürşelärneñ ber bersenä tawış birüennän başqa Yevrovidenie bulmas ide. Anda Gretisä häm Kipr berbersenä daimi 12şär bal cibärä, Balkan häm Skandinaviä illäre ber bersenä küp tawış birä. Beräwlär monı - kürşelärçä teläktäşlek, dip atıy, ikençelär – bu uyın, di.

Bıyıl bäygedä berençe tapqır Gruziä wäkile cırlıyaçaq, Ärmänstan artistı ikençe tapqır qatnaşa, Azerbäycan da bulaçaq, Kavkazda yaña berektäşlekneñ barlıqqa kilü mömkinlege barmı? Bu xaqta Keith Mills bolay di:

"Minem belüemçä Ärmänstan häm Azerbäycannıñ araları äybät tügel, Ärmanstan belän Törkiä arasında mönäsäbätlär duslarça diep bulmıy, monda blok tözelü qurqınıçı zur tügel, dip sanyım"

Yevrovidenie bäygesendä berniçä yıl elek Rusiä isemennän cırçı Alsu qatnaşıp, ikençe urınnı alğan ide. Tatarstan cırçısı Mälikä, Yevoivideniedä çığış yasarğa xıyalı barlığın äytep kilä. Rusiä isemennän, bıyıl anda, yaña barlıqqa kilgän "Serebro" digän törkem çığış yasıyaçaq.

Bikä Timerova
XS
SM
MD
LG