Accessibility links

Кайнар хәбәр

A380 Superjumbo Airbus däräcäsen üstererme?


Dönyanıñ iñ zur ike oçqıçın Airbus A380 Superjumbolarnı düşämbe kiçke säğätlärdä, bersen - Amerikanıñ New York, ikençesen – könbatış yarındağı Los Angeles şähärendä köttelär. Qanatı futbol qırınnan da zurraq, üz eçenä 550 yulçını ala alğan bu oçqıçlarnıñ kiläçäge nindi?

Germaniäneñ Lufthansa şirkäte kebek aqlı-zäñgärle altın töslärgä buyalğan Airbustan New Yorknıñ Kennedy hawa alanında 500gä yaqın yulçı häm jurnalistnıñ çığuın kötälär. Los Angelesnıñ xalıqara hawa mäydanına isä Awstraliäneñ Qantas hawa yulları şirkäte töslärenä, qızıllı-aqlı altınğa buyalğan oçqıç – yulçısız, barı tik oçuçıları belän kitte. Bu sınaw oçışlarınıñ maqsatı –oçqıç belän cirdäge idarä arasında elemtäne caylaw, oçqıçqa kilep utırırğa häm oçıp kitergä kiräkle bulğan kiñlekne belü, hawa alannarınıñ ber yulı 500dän artıq yulçını häm alarnıñ yöklären buşatu mömkinlegen tikşerü.

Sişämbe 20 mart könne şundıy uq oçqıç sınaw räweşendä dönyanıñ iñ zur hawa alannarınıñ bersenä, Chicagonıñ O''Hare hawa mäydanına yul alaçaq.

Yaña oçqıçlar – yulçılar häm yök taşu maşinaları bularaq qına tügel, ä problemalarğa batqan Airbus şirkäteneñ abruyın kütärügä etärgeç bularaq ta qarala.

Britaniädäge "Flight İnternational" jurnalınnan texnika belgeçe Robert Coppinger, citeşterüne kiçekterü şirkätneñ däräcäsenä külägä töşerde, dip belderde:

"Airbusnıñ image problemaları bar. Citeşterü problemaları minemçä xäzer inde artqı planda qaldı, sınaw programmaları yaxşı bara. Oçqıçnı tanıtu probleması bar, ämma oçqıç üze yaxşı eşli."

Närsä soñ ul Airbus?

Bu şirkät üzenä Yevropa Berlegendäge berniçä ilneñ hawa yulları şirkätlären berläşterä. Bigräk tä AQŞnıñ Boieng şirkäten dä üzenä alğaç, Airbusnıñ soñğı 20 yıldağı üseşe bik zur buldı. Yaña oqçıç tözeleşe waqıtında – şirkätneñ törle keçkenä şirkätlärdän toruı, alarnıñ törle illärdä buluı – qıyınlıqlar tudıra başladı. Misal öçen Germaniä belän Fransiäneñ komputer çeltärläre ber bersenä turı kilmäwe säbäple – A380 oçqıçı öçen äzerlängän böten elektr çeltärläre yuqqa çıqtı. Bu problemalarnı xäl itü 2 yılğa yaqın waqıt aldı, yaña oçqıçnı citeşterü kiçekterelde, hawa yulları şirkätläre aldan birgän möräcätlärennän baş tarta başladı, näticädä Airbus şirkäte 6 milliard 600 million dollar aqçasın yuğalttı. Bügenge köndä 166 Superjumbo oçqıçına taläp bar. Ämma taläp artmasa – Airbus şirkäte inde kilgän ziyannı qaplıy almayaçaq. Mäğlüm bulğança Airbus şirkäte Yevropada üzeneñ 10 meñ xezmätkären qısqarta.

Bu zur proyektqa kerüe belän şirkät üz östenä bik zur cawaplılıq aldı, dip sanıy belgeçlär. Boeing şirkäte dä Atlantik okean aşa oçır öçen üzeneñ yaña 787nçe modelen täqdim itä. Anı alırğa teläwçe şirkätlär sanı kübräk. Alaysa Airbus yalğış yuldamı? "Flight İnternational" jurnalınnan texnika belgeçe Robert Coppinger:

"Minemçä yıraq kiläçäktä alar ikese dä ciñä ala."

Alsu Qormaş
XS
SM
MD
LG