Uzğan atna axırında Mäskäwneñ tatar başqort zıyalılar klubı tarixçı ğalim Lev Ğumilevnıñ tuuına 95 yıl tuluğa bağışlap, ädäbi- muzıkal' kiçä uzdırdı. “Min urıs keşese bulsam da ğömerem buyı tatarlarnı yaladan yaqladım” dip yazğan ğalimgä tatarlar arasında ayırım mönäsäbät. Qazannıñ üzägendä meñ yıllıqqa bağışlap tözelgän Peterbur uramı başında Gumilev häykäle barlıqqa kilü dä şuñar ber işarä. Zıyalılar klubında uzğan oçraşuğa maxsus räweştä Ğumilevnıñ Peterburdağı muzey fatirı direktorı Marina Kozıreva da çaqırılğan ide. Ul 1963 yıldan birle Lev Gumilev belän bergä eşlägän, xäzer inde 12 yıl buyı şul muzeynıñ direktorı. Oçraşu barışında Marina Kozıreva Ğumilevnıñ tormışı, eşçänlege turında çığış yasadı, häm anıñ ssenariäse buyınça eşlängän 25 minutlıq tasma da kürsätelde. Zıyalılar klubı Ğumilevnıñ Peterburdağı muzey fatirına büläk itep faks tapşırdı. Marina Qozıreva bu oçraşu öçen räxmätlären belderde. Tatarlar arasında Ğumilevnıñ dusları küp ide. Mongol- tatar zolımı bulmağanlıqnı isbat itkänlege öçen Gumilevqa küp awırlıqlar kiçerergä turı kilde. Yalalar belän xökemgä tartılğan Gumilevqa 14 yılğa yaqın törle törmälärdä Stalin lager'larında utırırğa turı kilüen söyläde Marina Kozıreva. Ä inde Zıyalılar klubı oçraşudan soñ bu millät şundıy berdäm, zurlarnı xörmätle torğan millät ikän andıy millät berqayçan da yuqqa çıqmayaçaq, dide Marina Kozıreva. Oçraşunıñ muzıkal häm ädäbi programması da kiçä temasınnan çığıp eşlängän ide. Lev Ğumilevnıñ änise Anna Axmatova häm ätise Nikolay Ğumilev şiğerlären Rusiäneñ xalıq artistı Mäskäw teatrlarınıñ bersendä xezmät itüçe Gennadiy Räşit ulı Säyfullin uqıdı. Zıyalılar klubı stependiatı, Mäskäw konservatoriäse qarşındağı talantlı balalar mäktäbendä uquçı Arslan Säyfi skripkada Glazunov äsärlären başqardı. Mäskäw zıyalıları şulay Tatarstannıñ xalıq artistkası Klara Xäyretdinova başqaruında Koççininnıñ Awe Mariä digän cırın da cırçılar Aygöl Xäyri, Artur İslamov, Nailä Fatixova, Roza Xabibullina çığışların tıñladılar. Lev Gumilevqa bağışlanğan Zıyalılar klubındağı oçraşu xaqında Tatarstannıñ wäkälätle wäkile Nazif Mirixanov ta çığış yasap, Ğumilevnıñ tatar millätenä qarata bulğan tarixi eşçänlegen, tatar ğalimnäreneñ eşçänlegenä qarağanda da yuğarıraq tora dip bäyäläde.
Zıyalılar Klubındağı oçraşuda Mäskäwneñ küp kenä tanılğan zıyalıları qatnaştı. Alar arasında Renat häm Räsim Aqçurinnar, Rusiäneñ möftilär şurası räise Rawil Gaynetdin, Gumilev uquların üz gazetalırnda başlap cibärgän “Татарские новости” häm “Татарский мир” gazetalarınıñ möxärirläre - barlığı 140 yaqın keşe bar ide. Kiçädä Peterburdan maxsus kiterelgän, “Lev Gumilev turında zamandaşları” digän kitap ta satıldı.
Näzifä Kärimova, Mäskäw
