Accessibility links

сишәмбе, 6 декабрь 2016, Казан вакыты 23:04

Çallıda federal bina


Çallı uramnarında militsiä xezmätkärläre bermä-ber artıq bulıp kürenä ikän, monı ike yünäleştä farazlarğa mömkin: şähärdä militsiä maxsus operatsiä ütkärä yäki Qazan häm Mäskäw kebek başqalalardan räsmi türälärneñ kilüe kötelä. Xäyer, mondıy küreneş ber Çallığa ğına xas tügel. Sişämbe könne uramnarda militsionerlarnıñ kübäyüe şähärgä Tatarstan premyer-ministrı Röstäm Minnexanov kilüe belän bäyle ide. Respublika premyerı üzeneñ säfäre barışında berniçä çarada qatnaştı. İrtänge yaqta ul şähär citäkçeläre belän KamAZnıñ fänni-texnik üzägendä buldı. Annan soñ şähär urtasında tözelgän federal' kaznaçıylıq yortın açu tantanasına kilde. Biredä premyer-ministr Röstäm Minnexanov üz çığışın bolay başladı:

- Bez äle genä üzebezneñ avtomobil' gigantınıñ fänni-texnik üzägendä bulıp, anıñ kiläçäge belän tanıştıq. Avtomobil' sänäğäte bulğan cirdä - kiläçäkkä ömet bulırğa tieş - dide häm iğtibarnı kaznaçıylıq yortına küçerep, älege bina bik citdi häm kiräkle ide. Biredä federal' byudjet belän, üzara mönäsäbätlär xäl itelep, Tatarstannıñ ikençe başqalası bulğan Çallınıñ üseşenä kiteräçäk digän ışanıçın belderde. Şuşında uq çığış yasağan Çallı başlığı İldar Xalikov uzğan yıl şähärdä 2005 yıl belän çağıştırğanda citeşterü külämeneñ 23%qa artuın äytte. Tuqay rayonı citäkçese Tahir Xarmatullin çığışı:

" Bezneñ cömhüriätebezdä mähabät binalar üsep çığa. Bu - respublikabızda iq'tisadnıñ totrıqlı buluın dälilli. Uzğan yıl Tuqay rayonında citeşterüdäge üseş 2005 yılğa qarağanda 18%. Menä şuşındıy binalar Watanıbıznıñ alğa baruına öndäp torır dip uylıym. Tatarda ber äytem bar: "Matur yortlar tözegändä, quanıçı belän bulsın", dilär. Şulay bulsın ide".

4 qatlı federal' kaznaçılıq binasınıñ ğomumi küläme 3 meñ kv.m. çaması. Şunıñ 300 kv.m. Tuqay rayonı bülegenä birelgän. Xezmätkärlär sanı mondıy - Kaznaçılıqnıñ Çallı bülegendä - 45, Tuqaynıqında 15 keşe eşliäçäk.

Soñınnan premyer-ministr Minnexanov Çallı şähär Şurası deputatlarınıñ yıllıq sessiäsendä qatnaştı häm çığış yasadı.

Çallı, Ğafiulla Ğaziz

XS
SM
MD
LG