Accessibility links

чәршәмбе, 7 декабрь 2016, Казан вакыты 21:20

Rusiädä ber täwlek eçendä ike faciğädä 170-läp keşe ülde


Rusiädä soñğı täwlek eçendä bulğan ike faciğä zur sanda keşeneñ ülemenä kiterde. Düşämbedä Seberdäge Kemerovo ölkäsendä şaxtada bulğan şartlaw näticäsendä 100-dän artıq kümerçe häläk buldı. Sişämbedä könyaqtağı Krasnodar krayında kartlar yortında yanğın çığıp 60-tan artıq keşe ülde.

Kemerovo ölkäseneñ Novokuznetski şähäre yanında Ulyanov şaxtasında bulğan şartlaw Rusiäneñ kümer bazlarında sovet çorınnan soñğı iñ zur faciğä buldı. Räsmilär äytüenä qarağanda, düşämbedä şaxtada cixaznı tikşerü eşläre başaqrılğan, şul waqıtta şartlaw yañğırağan. Farazlarğa qarağanda metan gazı yä kümer tuzanı şartlağan bulırğa mömkin. Şartlaw waqıtında bazda 203 keşe bulğan. Şularnıñ 104-e häläk bulğan, 93-e qotqarılğan, tağın 6-sı älegä xäbärsez yuğalğan sanala.

Qorbannar arasında şaxta citäkçeläre, Britaniä belgeçe häm anıñ tärcemäçese bar. Britaniädä citeşterelgän cixaznı tikşerü öçen alar bazğa töşkän bulğan.

Rusiäneñ ğädättän-tış xällär ministrı Sergei Şoygu sişämbedä Novokuznetskida qotqaru eşläre barışı belän tanıştırdı:

"İñ qatlawlı urınğa cittek. Cimerelülär bik zur. Saqlıq belän genä barabız. Şartlaw näticäsendä şaxtanıñ elemtä çaraları yuq itelgän. Bu da eşlärne awırayta" di Rusiäneñ ğädättän-tış xällär ministrı.

Şuşı qaza 1991 yılda Sovetlar Berlege cimerelgännän birle Rusiäneñ kümer bazlarında iñ zur faciğä buldı. 1997 yılda şul uq töbäktä metan gazı şartlaw näticäsendä 67 keşe ülgän ide.

Sişämbe irtäsendä Rusiäneñ bu yulı könyağınnan tağın ber faciğä turında xäbär kilde. Uzğan töndä Krasnodar krayınıñ Kamışevat awılında kartlar yortında yanğın çığu näticäsendä 62 keşe häläk bulğan. Alar arasında kartlarğa yanğan binadan çığırğa yärdäm itergä tırışqan 58 yäşlek şäfqät tutaşı Lidiya Peçensova da bar. Tağın 33 keşe törle däräcädä cäräxätlär alğan, kübese xastaxanägä kiterlgän.

Yanğın çığunıñ säbäbe älegä tögäl bilgele tügel. Kartlar yortınıñ yoqı binası tulısınça yanıp betkän. Awılnıñ üzendä yanğın sünderü bülege yuq. Kürşedäge yanğın sünderüçelär yanğın urınına kilep citkänçe ber säğät çaması waqıt ütkän.

Soñğı waqıtta Rusiädä mäktäp, xastaxanä, internat häm başqa şundıy däwlät qaramağındağı urınnarda yanğın çığu yış küreneşkä äylände.

Sişämbedä Rusiä prezidentı Vladimir Putin, xökümät citäkçesennän, bu soñğı ike faciğäneñ häm dä Samarda bulğan oçqıç qazasınıñ säbäplären centekläp tikşerergä taläp itte. Uzğan şimbä Samarda oçqıç töşkändä bulğan qaza näticäsendä 6 keşe häläk bulğan ide.

Ali Ğilmi
XS
SM
MD
LG