Accessibility links

якшәмбе, 4 декабрь 2016, Казан вакыты 11:14

Holbrooke: Kosovoda köç qullanu başlansa monıñ öçen Rusiä cawaplı bulaçaq


Kosovonıñ bäysez bulaçağına AQŞnıñ BMOdağı elekke wäkile Richard Holbrooke şiklänmi. Kiläse ayda İminlek Şurasında bulaçaq tawış birüdä Rusiä moña qarşı çıqmas dip ömetlänä ul. Bosniä suğışına noqta quyğan Dayton kileşüen tözüçe Holbrooke äle dä xalıqara säyäsät turında üz qaraşların belderä. Azatlıqnıñ New Yorktağı xäbärçese amerikan diplomatı belän Rusiä-Gruziä mönäsäbätläre, Rusiäneñ Kosovo bäysezlegenä qaraşı turında söyläşte.

Azatlıq radiosı xäbärçese Nikola Krastev belän bulğan äñgämädä, Holbrooke ni öçen Gruziä prezidentı Mixail Saakaşvilinı yaqlağanın añlattı. Ber kem dä kamil tügel, ämma eşlägän eşlär näticäse – yaqlaw qazanırlıq, dide ul:

"Minem anı yaqlawnıñ nigezendä – anıñ eşe näticäläre. Älbättä Gruziädä problemalar bar. Ämma ul citäkçelekkä kilgändä il bölgenlektä ide. Elektr yuq ide, xökümät xezmätkärlärenä xezmät xaqları tülänmi ide, keşelär urlıy ide. Xäzer anda üseş bar, büdjet bar, näticälär şaqqatırğıç. Anıñ belemne amerikada alğanı ber nindi dä yoğıntı yasamadı."

Rusiä belän Gruziä arasındağı kierenkelek xalıqara cämäğätçelekne dä borçıy. Rusiä Gruziä belän mönäsäbätläre turında BMOda söyläşü buluın telämi, BM dä moña bik qatnaşmıy. BMOda AQŞ Rusiägä, Gruziä mäsäläsendä nindi dä bulsa taşlama yasasa, bälki Mäskäw dä Waşington öçen möhim bulğan Tönyaq Korea yäki İrannıñ atom programmaları mäsäläsendä üzeneñ qatği qaraşın yomşartır ide? Mömkin tügel, di Holbrooke:

"AQŞ Gruziä mäsäläsendä taşlamağa barır dip ışanmıym, häm min moña qarşı. Gruziäneñ territorial bötenlegen saqlap qaluı möhim. Rusiä Abxaziä häm Könyaq Ossetiädäge qanunsız xakimiätlärne yaqlawdan tuqtarğa tieş. Anda Gruziä üz xakimiäten tözergä tieş."

Rusiäneñ Kosovo bäysezlegenä qarşı çığuı – ber yaqtan Belgradtağı köçlärne qanatlandıra, ikençe yaqtan Kosovoda köç qullanu başlanu ixtimalın arttıra. Amerikan diplomatı, köç qullanu çığa qalsa bu barı tik Rusiä ğämälläre näticäse bulaçaq, dip sanıy:

"Kosovo hiçşiksez bäysez bulaçaq. Rusiäneñ Marti Ahtisaari planına qarşı çığuı – eşlärne bik qatlawlandıra. Ägär dä Ahtisaari täqdimnäre kiläse ayda İminlek Şurasında xuplanmasa – Kosovoda qan qoyış başlanaçaq, häm bu – Rusiä eşe näticäse bulaçaq. Bügen New York Times Rusiäneñ BMOdağı wäkile Vitaly Çurkin süzlären bastırıp çığardı. Çurkin Ahtisaari planına qarşı çığa häm anıñ urınına yaña keşene bilgelärgä çaqıra. Bu yalğış."

Amerikanıñ BMOdağı elekke ilçese Rusiäneñ İminlek Şurasında Ahtisaari planına qarşı tawış birmiäçägenä ömetlänä. Rusiä monıñ urınına bäysez Kosovoda serb azçılığın yaqlaw çaraların kürä ala, di Holbrooke.

Alsu Qormaş
XS
SM
MD
LG