Accessibility links

җомга, 9 декабрь 2016, Казан вакыты 05:03

Çallı Detroyt bulırmı?


Älege sessiäneñ berençe üzençälege şunda - ğädättägeçä, 800 citäkçe qatnaşında ütä torğan xisap sessiäsendä şähär başlığı İldar Xalikov tügel, şähär başqarma komitetı citäkçese Wasıyl Şäyxraziev ütkän yılğa yomğaq yasadı. Ä menä Tatarstannıñ başqa rayon - şähärlärendä iske ğädät buyınça administratsiä başlıqları xisap tota ikän. Älege çarada qatnaşqan premyer-ministr Röstäm Miñnexanov monı uñay küreneş dip bäyäläde. Premyer-ministr KamAZnıñ çit il partnerları belän traktor eşläw buyınça yaña proyektın xupladı, respublika kürsätkeçläre KamAZğa bäyle, dide. Şulay da Çallı öçen küp milliard sumnarda aqça wäğdä itte. Premyer-ministrnıñ "Çallı-Qazan" yulı yaqındağı 3 yılda tözelep, yañartılıp betäçäk digän süze alqışlarğa kümelde. Bu eş öçen 300 million dollar kiräk bulaçaq. İnde bıyıl uq respublika şuşı yulğa 100 million dollarlıq kredit aqçaların salırğa uylıy. "Läkin älegä qayber sorawlar bar, yul - federatsiä qaramağında"- dide Röstäm Miñnexanov. Çallı başlığı İldar Xalikov - byudjetta eşläwçelärneñ xezmät xaqı az bulu töp problema bulıp tora, dip beldergän ide. Moña cawap itep, Röstäm Miñnexanov, yaqın arada byudjet ölkäsendä reforma bulaçağın, törle berläşmälärgä avtonom uçrejdenie statusı bireläçägen äytte. Mäsälän, alğa taba mäktäp direktorları üzläre tapqan aqçanı möstäkıyl' räweştä tota alaçaqlar. Mondıy sistema Tömändä häm başqa qayber töbäklärdä kertelgän, ä menä Tatarstanda Çallı berençelärdän bulıp şuşı täcribäne başlarğa tieş, digän fiker äytelde.

Çallı - Awropa formatındağı şähär bulırğa tieş, digän ide monnan 4 yıl çaması elek şähär xäkime İldar Xalikov. Çallı Awropa formatı bula aldımı, bulaçaqmı, monısı başqa söyläşü, şulay da Xalikov äfände sişämbe könne Çallınıñ, AQŞtağı avtomobil' sänäğäte başqalası Detroyt şähärenä yaqınayuı xaqında süz quzğattı. Anıñ äytüençä, Çallıda kiläçäktä yıl sayın 60 meñ yök maşinası, 100 meñ ciñel maşina cıyılaçaq. Alabuğada 100 meñ ciñel avtomobil' citeşterü küzdä totıla. Kama Ar'yağında avtomobil' sänäğäteneñ kiläçäge şulay farazlana. Tözeleş buyınça da üzgäreşlär buluı ixtimal. Şähär Şurası deputatı Rafail Nuretdinov üz çığışında, injenerlıq çeltärläre bulğan cir uçastokları Çallıda bıyıl betäçäk. Aldağı yılda yaña fatirnı 1 kv.m. 15 meñ sumğa artırğa mömkin, dide. Nuretdinov şulay uq Mendeleev rayonında sement zavodı tözü täqdime belän çıqtı. Mondıy zavodnıñ yaqınça bäyäse 120 mln. yevro toraçaq.

Ğafiulla Ğaziz, Çallı

XS
SM
MD
LG