Accessibility links

чәршәмбе, 7 декабрь 2016, Казан вакыты 19:34

Törkiädä Näwrüz bäyräme tınıç ütte


21 Mart Näwrüz Törkiädä kierenkelek belän kötelde. Mäglüm Näwrüz SSSR çorında tıyılğan bulu säbäple Törki xalıqlar tarafınnan qotlana almıy ide. Tik SSR cimerelgännän soñ Azerbaycan, Törkmänistan häm Üzbäkistan şuşı könne räsmi bäyräm bularaq qotlıy başladılar. Törkiädä dä şunnan soñ räsmi räweştä qotlana başladı, ä ğomumän Törkiädä bu bäyräm Kördlärneñ bäyräme dip bäyälänä häm tik alar tarafınnan ğına qotlana ide. Läkin Kördlär ğomumän şuşı bäyrämne forsat itep, xökümät organnarın tınıçsızlandırğan protest aktiflıqları da kürsätälär ide. Saqlıq köçläre belän bäreleşlär bula, xätta şularda keşelär dä ülä ide. İnde bu yıl da Näwrüz könendä tärtipsezleklär çığar digän qurqu belän xärbilär häm polistiä alarm vazğiätenä küçerelde. Kördlärneñ legal säyäsi oyışması Demokratik Cämğiät Partiäse dä şuşı bäyrämne tınıç qına uzdırırğa xalıqnı ügetläde. Şulay da 21-nçe Mart aldınnan İstanbul, Märsin kebek şähärlärdä tıyılğan demonstartsiälär ütkärelep polistiä belän bäreleşlär buldı. İstanbulda küpläp kördlär yäşägän ber ike rayonda Molotof Kokteylı dip atalğan binzen tutırılğan şeşälär qabızdırılıp şähär aftobuslarına ırğıtılıp alarnı yandıru vaqiäğäläre yışayğaç, şuşı rayonnarğa säfär yasağan aftobuslarğa polistiä eskortı birelde.

İnde 21-nçe Martqa kilsäk Ankarada Premierminister häm ministerlär qatnaşqan räsmi Näwrüz qotlaw yolası buldı. İñ qızığı da mädäniät häm turizm ministere Attila Koçnıñ täbänäk häm yuwan gäwdäse belän ut östennän sikerüwe buldı. Yola maydanında törki xalıqlarnıñ şul isäptän Tatarstan belän Başqortstan bayraqları da elengän ide.

Läkin tabiği iñ zur diqqätne küpçelek Kördlär yäşägän könyaq-könçığıştağı Diyarbakırda ütkärelgän yola buldı. Şuşı yolağa farazlarğa kürä 250-300 meñ qatnaştı. Yolanıñ tınıç ütüwe häm provokatsiä bulmawı öçen 2.500 politsiä dä küzätep bardı. Şulay da zur maydanda idänastı körd partizan oyışması PKK-nıñ törmädä totılğan liderı Abdullah Öcalannıñ räsemnäre, PKK bayraqları belän konfederalizm bayraqları, yäğni barlıq kördlärne berläştergän bayraqlar da kütärelde. Öcalan yaki PKK-nı yaqlağan şiğarlar qıçqıruçılarnı polistiä qarattı, qayberläre küz sağı astına alındı. DCP liderı Ahmet Türk yasağan çığışında “Bez ildä tınıçılıq urnaştıru öçen küp köç sarıf ittek, atışlarnı tuqtaunıñ iğlan itelüwendä zur rol uynadıq. Mart ayında partiäbezneñ 254 citäkçese küz sağı astına alındı, 72-se isä xökemgä tartıla. İnde Körd mäsäläse yaqın könçığışnıñ häm dönyanıñ mäsäläse bulıp tora” dip belderde.

Elekke DEP partiäsenän deputat bularaq parlamentqa saylanğan, läkin ant itü yolasında kördçä çığış yasağan öçen törmä cazasına xökem itelgän Leyla Zana çığışınıñ ber öleşen kördçä yasadı. Törekçä yasağan öleşendä isä “Kördlärneñ öç liderı bar. Bere Ğıyraq prezidentı Cälal Talabani, ikençese Kördistan federal rayon citäkçese Mäsud Barzani häm öçençese Citäkçe Öcalan bulıp tora. Körd xalğı kemgä dä qurqınıç täşkil itmi. Bergä yäşägän xalıqlarnı arttan çänçkän xalıq tügel. Körtlär arasında üz başığızğa mı, yuğisä bezneñ belän tigez räweştä me yäşärgä telisez digän anketa ütkärelsen. Min ışanam ki bu anketadan Kördlärneñ 90 %-ı bergä yäşärgä telibez dip äytäçäklär”, dide. Törek gazetalarınıñ diqqäten iñ küp Kördlärneñ öç liderı bar digän süzläre cälep ite. 24e Martta İstanbuldağı Tatarstan wäkilçelege bıyıl bişençese bulaçaq yäşlär bäygesen uzdıraçaq.İnde wäkilçelekneñ ni xätle ğomere qaldı, monısı isä mäğlüm tügel. Äxtäm İbrahim, İstanbul
XS
SM
MD
LG