Accessibility links

җомга, 9 декабрь 2016, Казан вакыты 10:38

Tatarstan militsiä xezmätkärläre Çeçnägä kitä


Comğa könne Tatarstannan 130lap militsiä xezmätkäre Çeçnyağa yul totaçaq. Bu säfärgä kitäçäk militsiä xezmätkärläreneñ närsä turında uylawın alar üzläre genä beläder. İsän-imin genä kire äylänep qaytırmı alar? İminlege niçek tä'min iteläçäk? Qılğan xezmätläre citärlek bäyälänerme? Bu sorawlarnı bez Tatarstan eçke eşlär ministrlığınıñ matbuğat üzäge xezmätkäre Älfiä Safinağa yulladıq:

Çeçnyağa kitäçäk xezmätkärlär xärbi xezmättä bulırğa tieşle keşelär. Häm alar, alarnıñ ğailäläre dä iminiätläşterelgän. Çeçen cirenä kitkänçe xezmätkärlär xärbi öyränü ütä. Häm alar bit anda xärbi çaralarda qatnaşmıy, barı tik andağı cämäğät iminlegen saqlayaçaq.

Ber yaqtan qarağanda eçke eşlär ministrlığı xezmätkärläre mondağı eşçänlegen däwam itäçäklär. Ämma bilgele bulğança, Tatarstandağı xäl belän Çeçnyanı çağıştıru mömkin tügel. Matbuğat üzäge xezmätkäre äytüençä, militsiä xezmätkärläreneñ kübese Çeçnyağa üz teläge belän kitä. Ämma aralarında qanunğa buysınıp baruçıları da bar.

Tatarstan eçke eşlär ministrlığı xezmätkärläre 2000nçe yıldan başlap Çeçnyağa cibärelä. Alar ber yılda ğına qaynar noqtağa barmıyça qalğan. Säbäbe - Qazannıñ meñ yıllığın bäyräm itkändä alar başqalada iminlek saqlağan.

Çeçnya xezmäte öçen militsiä xezmätkärläre küpme aqça aluı turında mäğlümat yabıq, di Älfiä Safina. Ämma şunısı açıq, bernindi aqçağa da sälämätlekne kire qaytarıp bulmıy. Belgeçlär äytüençä, tınıç bulmağan töbäklärdä bulıp qaytqan keşelärneñ anda alğan “ostalığın” kire qaytqaç ta däwam itä torğan ğädäte bar. Sälämätlekläre qaqşaw ser tügel, ä psixikaları bozılu arqasında tınıç tormışta da qoral qullanırğa mömkinnär. Altı yıl eçendä Çeçnyada Tatarstannıñ 7 yegete häläk buldı, di eçke eşlär ministrlığınıñ matbuğat üzäge xezmätkäre Älfiä Safina. Çallı yegete şuşı yılnıñ 23 fevralendä ülgän. Ul boevkilar belän bäreleş waqıtında yädrä astında yatıp qalğan. Boyıviklarnı berençe bulıp kürep alıp Çallı yegete Viktor Konovalov berençe bulıp ut aça häm şunıñ belän üzeneñ arttağı iptäşlären dä qotqarıp qala.

Çeçnyağa kitäçäk eçke eşlär ministrlığınıñ xezmätkärläre törle büleklärdä eşli. Cinayätlärne açu, uçastok militsionerı, üzläreneñ etläre belän yulğa çığaçaq kinologlar anda yartı yıl xezmät itäçäk.

Al'bina Zäynulla

XS
SM
MD
LG