Udmurtiä cirendä räsmi räweştä eşläp kilüçe 20 artıq mäçet isäplänä. Ğibädät qılu binalarınıñ kübese soñğı yıllarda safqa bastı. Ämma mäçetlär arasında ğasırdan artıq tarixları bulğan iman yortları da bar. Şundıylardan- Votkinskiy şähäre mäçete isäplänä. Ul inde 215 yıl buyına möselmannarnı üzenä cälep itä. Şunısı iğtibarğa layıq- möselmannar mäçetne berqayçan da yabarğa irek birmägännär, anı iman yortı bularaq saqlap qala alğannar.
215 yıllıq tarixı bulğan mäçet bügen dä din totuçılar belän tulı. Soñğı un yılda imam wazifasın başqaruçı Möxämmätnur xäzrät Aşrapov mäçetne yañartu, din totuçılar sanın arttıru buyınça küp eşlär başqardı. İñ berençe çiratta ağaçtan salınğan mäçetne taş belän uratıp aluğa ireşte, manarasın tözätte, yanqorma tözette. Bu eştä aña möselmannar da, şähär administratsiäse dä yärdäm itte.
Mäçetneñ tışqı küreneşe genä tügel, anıñ eçtälegendä dä üzgäreşlär sizelerlek. Süz Möxämmätnur xäzrät Aşrapovqa.
Möxämmätnur xäzrät süzlärençä, elek biregä xatın-qızlar yörmägän. Ul möslimälär öçen ayırım urın äzerlärgä ireşkäç, xatın-qızlar öçen genä tügel, balalarnı uqıtu buyınça da mömkinleklär tudırılğan. Möxämmätnur xäzrät belderüençä, xäzer mäçetkä yörüçe möslimälär sanı ir-atlarğa qarağanda artıq ta ikän.
Däreslärne dä küñelendä iman nurı bulğan här keşe öçen añlayışlı itep - ike rus häm tatar tellärendä alıp baralar. Şulay uq ğailälär belän eşläwgä dä iğtibar birälär. Xäzrät belderüençä, şähärdä qatnaş ğailälär küp ikän. Qayseber ğailälärdä başta mäçetkä balaları yöri başlağan, soñraq ulları-qızları belän äti-äniläre dä dingä tartılğan.
Votkinskiy şähäreneñ pedagogika kölliyätendä ber bülmä söyläşep alğannar. Anda «İman» yäşläre berlege äğzaları ğäräp häm tatar telen üzläşterä. Döres, älegä monda keşe küp yörmi, kiläçäktä qızlar -yegetlär tartılır dip ömetlänä mäçet ähelläre dä, Berlekneñ citäkçese Ayrat Gazimcanov ta.
Mäçetkä yörüçe ölkännär küñelendä 30 yıllar waqiğaları da saqlana. Bu xaqta berniçä yıl üze dä imam wazifasın başqarğan Fazılcan Gazimcanov söyläde.
Faiz ağa Zakirov süzlärençä, mäçettä dini belem nigezlären öyrängän ölkännär islam dine qanunnarın tieşle däräcädä ütäp yäşärgä omtılalar.
Mäğsumcan ağa Gabdullin din nigezlären öyränep kenä qalmağan, xacğa barırğa da mömkinlek tapqan.
Şulay itep Votkinskiy mäçete şähärdä yäşäwçelär arasında tınıç häm eşlekle eş alıp bara.
Xämidä Ğayfullina, Udmurtiä
