Accessibility links

якшәмбе, 4 декабрь 2016, Казан вакыты 11:23

Başqortstanda tatarlar niçek yäşi?


Atnakiç könne Başqortstan tatarlarınıñ mäs’äläläre tikşerelgän ber cıyın ütte. “Başqortstan tatar zıyalılarınıñ “tügäräk östäle” dip atalğan bu söyläşü baştan berqayda da iğlan itelmäde. Anda barı tik Başqortstan xakimiätläre qaramağındağı tatar milli oyışmaları citäkçeläre genä çaqırılğan bulıp çıqtı.



Cıyın Başqortstan däwlät pedagogiä universitetında ütte. Anda küp çaqırıluçılar tatar zıyalıları tügel, ä başqort xakimiätläre wäkilläre häm başqort milli oyışmaları äğzaları kübräk buldı.



Cıyınnı da Başqortstan mädäniät häm milli säyäsät ministrı urınbasarı Rafail' Şafikov açtı häm alıp bardı.



İñ başta süzne “Ramazan” törki milli-ağartu üzäge räise Marat Şäripovqa birde ul. Marat äfände Başqortstanda üzläre başqarğan eşlär xaqında söyläde. Başqortstannıñ Rus däwlätenä quşıluına 450 yıl tuluğa bağışlanğan çaralarda tatar oyışmaları da ixlas qatnaşsın dip ügetläde ul.



Annan süz Başqortstan Tatarları Morzaları mäclese räise Maqsat Mämlievqa birelde. Ul şuşı oyışma eşe xaqında söylägäç, Başqortstan däwlät pedagogiä universitetı rektorı, “Watanım” cämğiäteneñ Başqortstandağı bülege räise Rail Äsädullinnı Morzalar medale belän büläkläde.



Annan soñ şul şatlıqtan Rail Äsädullin çığış yasadı. Ufağa “Watanım”nıñ töp citäkçese Rinat Möxämmädievnıñ kilüe, anıñ Prezident Mortaza Räximov belän oçraşuı xaqında xisle söyläde ul. Häm Başqortstannıñ Rus däwlätenä quşıluına 450 yıl tuluğa bağışlap ütkärelgän çaralarda tatar milli oyışmalarınıñ da aktiv qatnaşırğa tieşlegen täqrarladı ul.



Annan soñ “Säxipcamal” tatar xatın-qızları oyışması citäkçese Gölcihan Yähüdina çığış yasadı häm üzläreneñ eşläre xaqında söyläde.



Bu cıyında Başqortstan Tatar ictimaği üzäge räise Ayrat Ğiniätullin da kilgän ide. Läkin ul monda räsmi çaqırılmağan. Bolay, qızıqsınıp qına kilgän. Häm bu cıyınnı tänqitläp çıqtı ul.



“Bu - isem öçen genä ütkärelgän söyläşü, - dide ul. – Biregä tatar problemaların kütärgän oyışmalar tügel, ä Başqort xakimiätläre qubızına biegän kesä tatar oyışmaları ğına çaqırılğan”.



Şuşı cıyınğa qarata mönäsäbäten BR Tatar milli-mädäni moxtariäte räise Ramil Bignov ta belderde.



Soñğı aylarda Başqortstan tatarları problemaları ayıruça kiskenläşte, - di ul. – Ufada tözelüçe tatar gimnaziäse binasın cimerü, tatar mäktäplärenä köçläp başqort telen kertü, anı kertergä telämägän tatar direktorların häm mäğärif idäräläre citäkçelären wazıyfalarınnan buşatu kebek ğamällär barlıq cämäğätçelekne borçuğa saldı. Menä şundıy şartlarda Başqortstan xakimiätläre tatar cämäğätçelek oyışmaları belän xezmättäşlek itüläre xaqında xalıq küzenä töten cibärergä buldı axrı. Läkin monıñ belän genä keşelärne aldap bulmıy”.

Fänis Fätxi, Ufa

XS
SM
MD
LG