Accessibility links

сишәмбе, 6 декабрь 2016, Казан вакыты 13:20

Başqortstanda xakimiät başlıqların ğayeplilär


Bu atna azağında Başqortstannıñ beryulı berniçä rayonı häm şähärendä urınnardağı xakimiät başlıqlarına qarata qarşılıq çaraları ütä. Comğa könne Beloret şähäre cämäğätçelege, alar arasında eşquarlar da küp, şähär häm rayon başlığın eşennän alunı taläp itep miting ütkärde.



Bar Rusiägä militsiä häm OMON tarafınnan xalqı qıyinalu belän yaman atı taralğan Blagoveşçen şähärendä dä xalıqnıñ rizasızlıq dulqını kütärelä. Şähär cämäğätçelege biredäge xakimiät başlığı Änfäs Nuretdinovnı wazıyfasınnan alunı taläp itä. Nuretdinov äfändene bixisap korrupsiä ğämällärendä häm başqa gönahlarda ğayepläwçe Blagoveşçen xalqı anıñ östennän prezident Mortaza Räximovqa xat ta yullağan.

Respublikanıñ öçençe qızu töbäge – Kuşnarenko rayonı. Andağı cämäğätçelek tä cirle külämdä baş kütärülär äzerli. Şimbä könne andağı xalıq rayon xakimiäte başlığı Sergey Kasatkinnı wazıyfasınnan alunı taläp itep uram cıyını ütkäräçäk. 2005 yılda Ufadağı ber şirkättän kiterep quyılğan Sergey Kasatkinnıñ eş itü ısulların urındağı xalıq baştan uq önämägän ide. Bernindi säbäpsez törle citäkçelärne urınnarınnan buşatuda, buldıqlı eşquarlarnı ezärlekläwdä ğayıplädelär anı.



Kuşnarenko rayonı xalqınıñ qarşılıq çarasında törle qatlam xezmätçännär qatnaşaçağı mäğlüm. Ezärleklänüçe eşquarlar da, törle awıl xucalığı şirkätläre citäkçeläre dä, uqıtuçılar, mäktäp direktorları, balalar baqçaları mödirläre dä häm tağın küp kenä hönär iäläre çığaçağı mäğlüm bu mitingqa. Sergey Kasatkin küptän tügel rayondağı iñ aldınğı tatar mäktäbe, bıltır Rusiä prezidentınıñ 1 million sumlıq grantın alğan Baytallı urta mäktäbe direktorı İlfir Kotdusovnı wazıyfasınnan alırğa färman çığarğan. Bu ğämäl dä qarşılıq çarasın oyıştıruğa soñğı tamçı bulğan. Bar rayon mäktäpläre uqıtuçılarınıñ näfräten quzğatqan xakimneñ başbaştaqlığı. Rayon xakimenä qarşı 1 meñgä yaqın keşe qul quyğan qarşılıq belderüe dä äzerlängän. İlfir Kotdusov qarşılıq çarasında qatı taläplär quyılaçağın äytte.





XS
SM
MD
LG