Comğa irtäsendä Başqortstan tatarlarınıñ zur ğına törkeme Qazanğa Federal' Tatar milli-mädäni moxtariätneñ 3 nçe qorıltayında qatnaşu öçen kitte. Başqortstan Tatar milli-mädäni moxtariäte räise Ramil Bignov citäkçelek itkän bu wäkillekkä 21 keşe kerde. Näq menä şulqädär keşegä Qazandağı cıyınğa baru öçen kvota birelgän bulğan. Başqortstan wäkillege eçenä respublikadağı tatar milli xäräkäte eşçänlegendä aktiv qatnaşuçı şäxeslär kerä. Alar arasında milli oyışmalar citäkçeläre dä, ğalimnär dä, uqıtuçılar, mäktäp direktorları da, başqa hönär iäläre dä bar.
Elegräk tä xäbär itelüençä, Başqortstan Tatar milli-mädäni moxtariäte Federal' Tatar milli-mädäni moxtariäte tarafınnan tanılsa da, anıñ ber bülege bularaq raslansa da, Başqortstanda haman da räsmi terkälü ütä almadı. Bu xäldä tatar milli xäräkäte liderları Başqortstannıñ räsmi xakimiätlären ğayıpli. “Näq menä respublika citäkçelegeneñ turıdan-turı kürsätmäse, anıñ ayaq çaluı arqasında bezne haman da terkämilär, - di Başqortstan tatar milli-mädäni moxtariäte räise Ramil Bignov. – Terkämäuneñ säbäbe dä mäğlüm, çönki moxtariät wäkilläre Başqortstanda yäşäwçe tatarlarnıñ kisken problemaların açıqtan-açıq kütärep çığa häm bu xaqta bar Rusiägä bäyän itep tora”.
Comğa irtäsendä wäkillek Qazanğa kitär aldınnan, “Azatlıq” xäbärçese Başqortstan Tatar milli-mädäni moxtariäte räise urınbasarı, professor Mäcit Xucin belän söyläşep aldı. “Bez respublikadağı tatar moxtariäte eşçänlegen şaqtıy cayğa saldıq, - di Mäcit äfände. - Ämma äle quldan ıçqındırılğan mömkinleklär dä küp. Monda bez Başqortstan rayonnarında häm şähärlärendä tatar moxtariäte bülekläreneñ az buluı säbäpçe dip küräbez. Şuña kürä dä här rayonda ul büleklärne açarğa häm näticäle eşlätergä tieşbez”.
Mäcit Xucinnan Qazandağı qorıltayğa nindi täqdimnär häm teläklär belän baruları turında da soradıq.
“Berniçä eşlekle täqdim belän barabız”, - dide Mäcit äfände häm alarnı isemläp atadı.
