Accessibility links

дүшәмбе, 5 декабрь 2016, Казан вакыты 07:26

Ufada tatar cırı bäygese başlandı


Comğa könne Ufada tatar cırı başqaruçılarnıñ “Tuğan tel-2007” dip atalğan VII respublika sänğät yarışması başlanıp kitte. Anda 16 yäştän 35 yäşkä qädärge yäş talantlar qatnaşa. Başta bu bäygegä sälätle yäşlärne saylap alu Başqortstan rayonnarında häm şähärlärendä ütkän ide. Ufadağı yomğaqlaw öleşenä 70 tän artıq başqaruçı kilde. Bäygedä köçlären sınarğa teläwçelärneñ zur küpçelege Başqorstannıñ üzennän. Şulay uq Tatarstannan häm Ul''yanovsk şähärennän berniçä keşeneñ ğarizası alınğan.



“Tuğan tel” tatar cırı bäygesendä qatnaşuçılar, här yıldağıça, dürt cır başqarırğa tieş. İkeşär tatar xalıq cırı häm ikeşär estrada äsäre bulırğa tieş digän şart quyılğan. Üzeşçän cırçılarnıñ başqaru ostalığına bäyäne kürenekle tatar cırçısı Näzifä Kadıyrova citäkçelegendäge jyuri birä. Jyuri eçendä tağın tanılğan tatar cırçıları Fädis Ganiev, İdris Kälimullin, kompozitor Alik Lokmanov häm Ufa sänğät akademiäsennän sänğät belgeçläre, möğallimnär dä bar.



Tatar cırı respublika bäygeseneñ Gala-konsertı 25 mart könne bula. Şunda ciñüçelärne büläkläw dä qaralğan. Älege sänğät yarışmasınıñ rejisserı - tanılğan kompozitor, Bötendönya Tatar kongressınıñ Başqortstandağı daimi wäkile Alik Lokmanov. Anıñ süzlärençä, “Tuğan tel” bäygeseneñ Başqortstandağı yäş tatar cırçıların üsterüdä role bik zur.



“Ufada başlanğan “Tuğan tel-2007” tatar cırı başqaruçılar respublika bäygeseneñ soñğı köne tağın da küñelleräk häm tantanalıraq bulaçaq, - di Alik Lokmanov. – Anda ciñüçelärne büläkläw tantanası da, küñelle gala-konsert ta kötelä”.

Şuşı bäyge Alik äfändeneñ tormışındağı istälekle waqiğa belän dä turı kilde. 24 mart könne aña 60 yäş tula. Şulay itep kürkäm yubileen da yäş talantlarnı açıqlaw kebek mäşäqätle eş östendä ütkärä ul.

XS
SM
MD
LG