Accessibility links

якшәмбе, 11 декабрь 2016, Казан вакыты 03:26

Dönyanıñ yaña 7 moğcizasın saylaw tämamlana


Sezneñ, dönyanıñ 7 moğcizası turında işetkänegez barmı? Asılmalı Semiramida baqçaları, Olimpiädäge Zevs häykäle, Rodos utrawındağı Koloss, Efestağı Artemida ğibädätxanäse, İskändär mayağı, Mısır piramidaları üzeneñ texnik häm sänğäti ostalığı belän borınğı keşelärne şaqqatırğan bulğan.

2 meñ yıl elek tözelgän älege moğcizalar isemlegennän, bügenge köndä, Mısır piramidaları ğına isän qalğan. Qalğan altısı cir teträw yäki yanğın çığu säpäle, yuqqa çıqqan.

Şwetsariäle ezlänüçe häm rejiser Bernard Wenger, “ägär ul moğcizalarnı ber kem dä kürä almıy ikän, alardan ni fayda?”, digän sorawnı quyıp, isemlekne yañartu ideyasın kütärep çıqqan. Bu isemlekne ul ğadi keşelärdän sorap häm demokratik tawış birü aşa tözergä bulğan.

7 yıl elek Bernard Wenger üzeneñ aqçasına internet säxifä açqan bulğan. Aña “yaña 7 moğcizalar” digän isem birgän. http://www.new7wonders.com Xäzer bu säxifä ictimaği oyışma aqçasına totıla häm şuşı tikşerenügä bağışlap kitap häm film äzerlänä.

Älege isemlek 2007nçe yılnıñ 7nçe ayında 7nçe könnendä iğlan itelergä tieş. Yaña isemlekne iğlan itü waqiğası Lisabonda Portuпaliä başqalasında zur tantana räweşendä bilgeläp üteläçäk.

Ä aña qädär, distälägän ildän, millionlağan keşe, dönyanıñ yaña 7 moğcizası öçen, internet aşa, tawış birergä tieş. Anda inde 4 millionlap keşe kerep, 28 million tawış birgän. http://www.new7wonders.com säxifäsendä ğäcäyep borınğı qorılmalarnıñ yaqınça isemelege inde tözelgän. Anı törle keşelär täqdim itkän, alar säxifägä räsemnär, video faillar cibärgän, tawış birgän.

Älegä iñ populär häm ğäcäyep qorılmalar isemlegenä Yunanistan Akropolisı, Boyek Qıtay divarı, Hindstandağı Tac mahal, İstanbuldağı Aya-Sufiä ğibädätxanäse, Mäskäwdäge İzge Vasiliy xramı, Parijdağı Eifel manarası, Rio de Janeyroda, taw başına salınğan Ğäysä Päygämbär sını, Mısır piramidaları, Amerikadağı “Azatlıq” häykäle, Ürdündä tawğa uyılıp yasalğan Petra häykäle kertelgän. Zamança qorılmalardan bu isemlekkä - Avstraliä başqalasındağı opera binası täqdim itelgän.

www.new7wonders.com säxifäsen häm ğomumän bu kampaniäne “Yaña 7 moğciza fondı” kommersiäle bulmağan oyışma alıp bara. Ämma ul, yaña isemlekne iğlan utügä bağışlanğan Lisabondağı tantananı kürsätü xoquqlarına iä häm tabışnı da ul alaçaq. Fond wäkilläre, äytkänçä, aqçanıñ yartısın alar bulğan häykälne saqlawğa totıçaq. Mäsälän, Qıtaydağı Boyek divar işelep bara. Hindstandağı Tac mahal hawanıñ pıçranuı säbäple, aq töstän sorığa äwerelä bara. Älege oyışma wäkilläreneñ äytünä qarağanda, alar xäzer uq Äfğänstanda Taliban tarafınnan bombalanğan Buddanıñ borınğı sının torğızu eşen alıp bara.

Älege proyektnıñ süzçese Tia Viering aytkänçä, internet tawış birüdä 100dän artıq il qatnaşqan. Alar arasında Qıtay, Yunanistan, Hindstan, Brazil, Quşma Ştatlar, Peru, Meksika, Avstraliä, Germaniä, Kanada, Britaniä häm başqa illär bar. Viering, internet aşa ğına tügel, başqa yullar belän dä tawış birep bula, di.

Bezneñ telefon aşa tawış birü bar, tarixi häykällär bulğan illärdä SMS aşa tawış birü açılğan. Häm bez şunı küräbez, bik küp illärdä, bu tawış birü ğädättä bulğannardan ayırıla. Monda küp energiä ciyıla häm keşelär tawış birü urınnarına bara, internet kafelarda cıyıla, internet bulğan dusları yanına kilä, keşelär qatnaşırğa teli. Häm bu energiä häm katnaşu teläge, mondıy eş kön sayın bulmyı, digän añlaw bulğan cirlärdä köçleräk

Ämma bu ideyağa qarşı çığuçılar da bar. Mısır mädäniät ministrı Farouk Hosni yaña mogzialar isemlegen tözüne “absurd” dip atadı häm Mısırnıñ Borınğılıq Şurası başlığı Zahi Hawass Giza piramidaların isemlektän çığaru turında sorağan. Yaqın Könçığış yañalıqlar agentlığına ul, “Piramidalar dönya moğcizaları arasında tawış birügä möxtac tügel” dip beldergän.

Yaña 7 moğcizanı saylawnı oyıştırğan fond wäkile Viering, “Mısır iñ küp tawış birgän illär arasında buldı. Şuña, küpçelek mısırlılarnıñ alarnıñ räsmiläre belän ber üq fikerdä tügel ikänen küräbez”, dip belderä.

Qazanğa saylaw mömkinlege birelsä, keşelär dönyanıñ yaña 7 moğcizası isemlegenä närsäne täqdim itär ide ikän? Uramda oçrağan yegetlär moğcizalar isemlegenä Qazan kremlen, Söyembikä manarasın, Qol Şärif mäçeten kerter idek, alar tarixi häykäl, alarnıñ teläsä nindi mädäniät öçen qıymmäte bar, dip cawap birdelär. Urta yäştäge ir-at, dönya moğcizalarınıñ berse itep, texnik progress, internetnı atadı. Yäş tatar yeğete, Qol Şärif mäçeteneñ xalıqqa qaytarıluı moğcizağa tiñ, dip cawap birde. Urta yäştäge ber xanım, Qol Şärif mäçetendä ber möslimäneñ namazın şul xätle ixlas häm matur itep uquı möğciza bulıp kürende, dide. Başqa ber keşe, xäzerge zamanda keşene şaqqatırırlıq äyber qalmadı, äti-änigä, Watanğa, yaqınnarğa mäxäbbät kenä qaldı, digän fiker belderde. “Minem öçen, tatar yäşläreneñ tatarça belmäwe - dönyanıñ 8nçe moğcizası”-, dide tatar qızı. Uramda oçrağan tağın ber ir-at, “tormıştağı här närsä, tormış üze – moğciza” dip cawap birde.

Xäzerge waqıtta isemlektä dönya moğcizası däräcäsen däğwä itüçe 21 häykäl häm bina bar. Alar arasınnan 7ne saylap alırğa turı kiläçäk. Tawış birü axırğa yaqınlaşa, iğlan itü könenä 100gä yaqın kön qaldı. www.new7wonders.com

Bikä Timerova
XS
SM
MD
LG