Accessibility links

шимбә, 10 декабрь 2016, Казан вакыты 19:41

BMO İminlek Şurası İranğa çikläwlär turında rezolüsiä qabul itte


BMO Iminlek Şurası yäkşämbegä qarşı töndä İranğa çikläwlärne kiñäytü turında rezolüsiäne ber tawıştan qabul itte. Tähran rezolüsiäne "kiräksez häm nigesezsez" dip bäyäläde.

İminlek Şurası qararın New Yorkta Könyaq Afrikanıñ oyışmadağı wäkile Dumisani Kumalo iğlan itte:

"Rezolüsiä ölgesen 15 keşe yaqlap tawış birde. Rezolüsiä ber tawıştan 2007nçe yılnıñ 1747nçe rezolüsiäse bularaq ber tawıştan qabul itelde."

Yaña rezolüsiä İrannıñ qoral satuın çikli, xalıqara cämäğätçelekkä İranğa finans yardäm häm kreditlar birmäskä çaqıra. Şulay uq anda İrannıñ atom häm raketa programmalarına qatnaşı bulğan 28 keşe häm oyışmanıñ milken tuñdıru turında süz bara. Rezolüsiä İranğa bolarnı ütärgä 60 kön waqıt birä, şul waqıt eçendä üzgäreşlär bulmasa – iqtisadi sanksiälärne qırıslatırğa wäğdä birä. İranğa qarşı xärbi köç qullanu turında süz yuq. Şulay uq yaña rezolüsiädä İran räsmilärenä säyäxät itü çikläwlären kertü täqdim itelä.

Tawış birüdän soñ İminlek Şurasınıñ veto xoquqına iä 5 äğzase – Britaniä, qıtay, Fransiä, Rusiä, Quşma Ştatları, şulay uq Germaniä häm Yevropa Berlegeneñ yuğarı räsmi wäkile isemennän belderüne Britan diplomatı Emyr Jones Parry yasadı:

"İminlek Şurasınıñ 1747nçe rezolüsiäne ber tawıştan qabul itüe – xalıqara cämäğätçelekneñ İrannıñ atom programmasına tiränten borçılğanın kürsätä. İrannıñ moña qadär İminlek Şurası häm Xalıqara Atom İdaräse rezolüsiälären ütämägäne qızğanıç, bez İrannı xalıqara burıçların ütärgä çaqırabız."

İran atom programmasın qoral yasar öçen qullanğanın kire qağıp kilde, atom programması elektr yasar öçen kiräk, di İran.

İminlek Şurası aldında çığış yasağan İran tışqı eşlär ministrı Manuçer Mottaqi, rezolüsiäne "kiräksez häm nigesezsez" dip atadı, häm atom programmasınıñ barı tik tınıç maqsatlarda eşläwen belderde.

Kiçäge utırışta prezident Mäxmüd Äxmädinecad da qatnaşırğa teläk beldergän ide, ämma säfär soñğı minutta kiçekterelde. İran AQŞnı prezidentqa viza birmäwdä ğäyepläde, Waşington bu ğäyepläwne kire qaqtı.

Yaña rezolüsiä kertkän çikläwlär, Berläşkän Millätlärneñ Xalıqara Atom İdaräse İrannıñ uran bayıtuın kiçekterüen raslağannan soñ ğämäldän çığa ala.

Alsu Qormaş
XS
SM
MD
LG