Accessibility links

пәнҗешәмбе, 8 декабрь 2016, Казан вакыты 21:11

Başqortstannıñ Kuşnarenko rayonında miting ütte


Uzğan atna azağında Başqortstannıñ beryulı berniçä rayonı häm şähärendä urınnardağı xakimiät başlıqlarına qarata qarşılıq çaraları ütäçäge iğlan itelgän ide.

Şularnıñ berse – kümäk keşe qatnaşlığındağı miting Ufadan altmış çaqrım ğına yıraqlıqtağı Kuşnarenko rayonı üzägendä oyıştırıldı. Andağı cämäğätçelek rayon xakimiäte başlığı Sergey Qasatkinnı wazıyfasınnan alunı taläp itep uram cıyını ütkärde. 2005 yılda Ufadağı ber şirkättän kiterep quyılğan Sergey Qasatkinnıñ eş itü ısulların urındağı xalıq başbaştaqlıq dip sanıy. Başqortstanda çığuçı “Awraziä prospektı” dip atalğan gazetada ike bit tulısınça Sergey Qasatkinnıñ qırın ğämällärenä häm xalıq belän tupas möğaläma qıluına bağışlanğan. Andağı qayber faktlarnı uqısañ, baştağı çäçlär ürä torırlıq bula.

Kuşnarenko rayonı xalqınıñ 24 martta ütkärgän qarşılıq çarasında törle qatlam xezmätçännär, cämğısı 400ләп keşe qatnaştı. Uram cıyınında qatnaşuçılar xakimiät başlığın ğäyeplägän bixisap şiğar'lär dä totqan ide. Rayon xakime Sergey Qasatkinnı da aldan uq şuşı çarağa kilep xisap totarğa çaqırğan bulsalar da, bu mitingta bulmadı ul. Şuşı çara aldınnan ğına, respublikadağı iñ yaxşı şifaxanälärneñ berse – Krasnousol şifaxanäsenä yal itärgä kitüe mäğlüm buldı anıñ.

Rayon üzägendä ütkän uram cıyının oyıştıruçılarnıñ berse – rayonnıñ “Ağidel” isemendäge krästiän-fermer xucalığı räise Fähim Korbanov äytüençä, şuşı ğämäle belän dä rayon xakime Sergey Qasatkin Kuşnarenko xalqına qarata nindi mönäsäbättä buluın açıq kürsätte. “Xakimiät başlığı üzenä däğwälar belderüçe xalıq belän küzgä-küz oçraşırğa da qurqıp, yalğa çığıp kitkän”, - dide Fähim äfände.

Mitingnı rayondağı xörmätle keşelärneñ berse, eşquar Rawil Nurislamov açtı. Anıñ fikerençä, rayon xakime Sergey Qasatkinnıñ ike yıl eşçänlege däwerendä rayon iqtisatı kisken tübän tägärägän, sotsial' mäs'älälär xäl itelmi. “Sergey Qasatkin xalıq belän üzen dorfa tota, ul xuca, ä bez anıñ qolları kebek qılana, - dide Rawil äfände. – Rayon xaqimen wazıyfasınnan alu öçen, rayon Sovetı deputatlarına da möräcäğät itkän idek, ämma alar da xaqimgä qarşı barırğa qurqa. Bezgä andıy deputatlar da kiräkmi”.

Mitingta cämğısı 15 läp keşe çığış yasadı. Alar arasında eşquarlar, krest'yan-fermer xucalıqları citäkçeläre, mäktäplär häm balalar baqçaları direktorları, başqa hönär iäläre bar ide. Çığış yasawçılarnıñ berse – Baytallı mäktäbe direktorı İlfir Kotdusovnı rayon xaqime ber säbäpsez eştän buşatu öçen kisätü cibärgän. Bu kisätü ber ayğa täğäyenlängän. 28 mart könne anıñ waqıtı çığa. İñ ğacäpländergäne şul – Baytallı mäktäbe şuşı uqu yılına Rusiä prezidentınıñ 1 million sumlıq grantın otqan. İlfir äfände üze bu mäktäpkä 18 yıl buyı citäkçelek itep, Başqortstannıñ atqazanğan uqıtuçısı, Rusiäneñ mäğärif otliçniğı isemnären dä alğan. İlfir Kotdusov üz çığışında bezgä rayon xalqın izüçe häm qurqıtıp totuçı xakim tügel, ä üzebez saylağan buldıqlı citäkçe kiräk, digän fikeren ütkärde.

Mitingqa cıyılğan bar xalıq Sergey Qasatkin, kiçekmästän, üz wazıyfasınnan da töşerelergä tieş, alay ğına da tügel, rayonnan da çığıp kitärgä tieş, dip taläp itte. Miting axırında şundıy taläplär yazılğan qarar da qabul itelde.

Kuşnarenko rayonı üzägendä ütkän qarşılıq çarasına Blagoveşçen şähärennän dä zur ğına törkem ber wäkillek kilgän ide. Alar da üz şiğar'lären totqan. Blagoveşçen şähärendä dä xalıqnıñ rizasızlıq dulqını kütärelä. Şähär cämäğätçelege biredäge xakimiät başlığı Änfäs Nuretdinovnı wazıyfasınnan alunı taläp itä. Nuretdinov äfändene bixisap korrupsiä ğämällärendä häm başqa gönahlarda ğayıpläwçe Blagoveşçen xalqı anıñ östennän prezident Mortaza Räximovqa xat ta yullağan.

Respublikanıñ tağın ber töbägendä – Beloret şähärendä dä 27 mart könne şähär häm rayon xakimiäte başlığın eşennän alu öçen qarşılıq çarası ütäçäge mäğlüm. “Şuşındıy qarşılıq çaralarınıñ ber-ber artlı oyıştırıluınıñ töp säbäbe – rayonnar häm şähärlär başlıqlarınıñ Başqortstan şartlarında haman da östän quyıluı, prezident tarafınnan täğäyenlänüe, - dip belderelde Kuşnarenkoda uzğan mitingta. - Ägär xakimnärne urınnardağı xalıq üze saylasa, yuğarı türälär xalıq mänfägat'lären yaqlar, anı sanğa suğar ide. Ä bolay alar üzlären xan häm xuca dip kürä, niçek teli - şulay eşli”.

Fänis Fätxi, Ufa

XS
SM
MD
LG