Accessibility links

Кайнар хәбәр

Çallıda Azatlıqnı yaqlaw piketı uzdı


Ütkäreläçäk piket xaqında Çallı TİÜe iğlannar tarattı häm anda 25 nçe mart könne, säğät 10 nan 12 gä qädär 6-bistä tuqtalışında "Azatlıqnı" yaqlap çara ütkärelüe äytelgän ide. Piketqa dip kilgän 3 distägä yaqın keşe aldan äytelgänçä, 2 säğät buyı uramda basıp tora almadı. Qarlı-yañğırlı, yäkşämbe köne alarnı ber säğättän taralırğa mäcbür itte. Şuşı ber säğät eçendä, keşe küp yöri torğan urında menä mondıy eçtälekle şiğar'lär kütärelgän ide, alarnıñ küpçelege urısça bulğanlıqtan, tärcemädä biräm:

- "Azatlıq" radiosı Rusiä qarañğılığında yaqtılıq nurı.

- "Azatlıq" radiosınnan bez ğädel informatsiä alabız.

- Tatar türäläre, "Azatlıq" radiosın satmağız.

Piketta şuşılarğa oxşaşlı başqa şiğar'lär dä bar ide. Menä şuşındıy çaralarnıñ faydası, näticäse bulırmı? Älege sorawğa Çallı Tatar İctimaği Üzäge räise Räfis Kaşapov bolay cawap birde:

- Berençedän, şuşındıy qarlı, cille könne piketqa çıqqan millättäşlärebezgä räxmät. Bez "Azatlıq" radiosın yaqlap Çallıda berençe tapqır piket oyıştırabız. Bezgä qädär mondıy çaralar Başqortstanda, Qazanda ütte. Xäzer Samarada, Semberdä, Mäskäw häm Peterburda da millättäşlärebez şuşındıy aksiä ütkärergä äzerlänälär ikän. Telebez, dinebez, üzebezneñ radiobız öçen köräş bara. Köräş utı sünmäsä, Rusiä häm çit illär masştabında bergä-bergä köräş alıp barsaq, kiler ber kön, "Azatlıq" radiosı tulısınça eşläp kitär dip ışanıp qalabız. Bez ütkärgän qarşılıq aksiälärendä berençe tapqır bularaq, FSB, MVD häm administratsiä keşeläre kilep ber süz dä äytmädelär. Monısı minem öçen aptıraşlı xäl. Elekke kebek berketmälär tözü, başqa basım yasawlar bulmadı. Bälki älege strukturalar da "Azatlıq"nıñ yabıluı - xalıqnı kimsetü, cäberläw digän fikergä kilgännärder."

Piketta qatnaşqan Röstäm fikere:

- Elek min "Azatlıq"nı ğädäti radiodan tıñlıy idem. Yabılğaç, internet aşa tıñlıym, waqıt bulğanda, älbättä."

Şuşı piket barışında "Azatlıq" radiosın yaqlap imzalar cıyu da oyıştırılğan. Bu könne 31 keşe imzasın salğan. Ğomumän alğanda, Räfis Kaşapov äytüençä, mart ayında 500 dän artıq imza cıyılğan häm bu eş däwam itä

Ğafiulla Ğaziz, Çallı

XS
SM
MD
LG