Accessibility links

сишәмбе, 6 декабрь 2016, Казан вакыты 23:04

Ahtisaari Kosovo turındağı axırğı planın BMO İminlek Şurasına täqdim itä


BMOnıñ maxsus wäkile Martti Ahtisaarinıñ Kosovo statusı turında axırğı täqdimnärne BMOnıñ İminlek Şurasına täqdim itüe kötelä. Çiklängän bäysezlekne küz aldında totqan Ahtisaari planı Rusiäneñ açuın çığarğan ide. Rusiä tışqı eşlär ministrı Sergey Lavrov, ägär serb mänfäğätläre isäpkä alınmasa, Rusiä planğa qarşı tawış biräçäk dide.

Ayırım alğanda, Rusiä räsmiläre, Ahtisaari planında ölkädäge serb azçılığı tieşle därädä yaqlanmyı, dip belderä. Berniçä Rusiä säyäsi küzäteçese dä, BMO Kosovoğa quyılğan standartlarnı “tuñdırılğan” nizağlar, dip sanalğan Abxaziä, Dnestrbuyı häm Könyaq Osetiägä qarata qullanmyı, dip äytte. Rusiäneñ qatı belderülärenä qaramastan, küp kenä belğeçlär, Mäskäwneñ veto salu xoquqın qullanaçağına şiklänep qarıy. Töbäk belğeçe Partick Moore bu xaqta bolay dide:

“Minem uylawımça, Rusiä ügetliäçäk häm satulaşaçaq, läkin şul uq waqıtta,ul, veto salu belän, şul uq minutta bu xalıqara mäsälädä üzeneñ säyäsi kapitalın yuğaltaçağın da añlıy.”

Yevropa Berlege häm Quşma Ştatlar älege planğa teläktäçlek kürsätä. Kovoso mäsäläsendäge qaraşı öçen Rusiä Könbatışta tänqitkä duçar buldı. Yevropa Berlege Rusiäne rezolutsiäne tuqtamasqa häm cawaplılıq xisen bergäläşep kürsätergä çaqırdı.

Ahtisaari planı Kosovoğa çiklängän möstäkillek birä. Plan nigezendä Kosovo konstitutsiäsen, bayrağın, gimnın buldıra alır ide. Başlıça Kosovodağı serblarnı yaqlaw öçen, töbäkne alğa taba da xalıqara cämäğätçelek küzätergä tieş bula. Kosovo 1999 yıldan birle BMO qaramağında yäşi. 15 meñ keşedän dä zurraq NATO ğäskäläre Kosovada tınıçlıq urnaştıru köçläre bularaq urnaşqan.

İminlek Şurasında niçek tawış birüe bilgele bulmağan il – ul Qıtay. Ämma bilgeçlär fikerençä, Pekinnıñ tawışı mäsälägä zıyan salmasqa tieş. Ahtisaari planı turında fiker alışu BMOnıñ İminlek Şurasında, yabıq işeklär artında, äprildä bulır dip kötelä.

Bikä Timerova.
XS
SM
MD
LG