Accessibility links

шимбә, 10 декабрь 2016, Казан вакыты 00:33

BMO Tatarstanğa narkomaniä belän köräşügä 113 meñ dollar biräçäk


Düşämbedä Qazanda Berläşkän millätlär oyışmasınıñ äf'yun häm cinayätçelek buyınça idäräseneñ Rusiä häm Belorussiädäge wäkillege buldı. BMO törkeme Tatarstanda äf'yungä qarşı İminlek Şurasınıñ tarmakara komissiäse citäkçese Zilä Wälieva belän oçraştı. Älege oçraşu näticäsendä respublikada narkomaniä belän köräşne arttıruğa yunälderelgän xezmättäşlek kileşüe tözelde.

Tatarstanda tözelgän BMO wäkillege törkeme belän respublika arasındağı kileşü nigezendä xalıqara oyışma tarafınnan Tatarstanğa narkomaniä belän köräşügä aqçalar bülenep bireläçäk. Äytergä kiräk mondıy xalıqara yärdämne respublika berençe tapqır alaçaq. Bu proyektta fäqät Tatarstan ğına qatnaşa. Ni öçen Berläşkän millätlär oyışması Tatarstannı saylağan soñ? Xalıqara oyışma däwlät däräcäsendä narkomaniä belän zur köräş alıp baruçı illär, töbäklär belän xezmättäşlek itä. Tatarstan şundıy töbäklärneñ berse.

Respublikada äf'yungä qarşı İminlek Şurasınıñ tarmakara komissiäse citäkçese Zilä Wälieva belderüençä, älege proyekt qısalarında Tatarstanda bernindi yaña oyışmalar da tözelmäyäçäk. Proyektnıñ maqsatı - bulğan strukturalarnı effektiv eşlätü. Töp eşçänlek xalıqnı konsul'tativ häm mäğlümatı yaqtan tä'min itügä yunäldereläçäk. Bu eştä narkomaniä belän turıdan turı köräşüçe meditsina oyışmaların sotsial' uçrejdenielär belän xezmättäşlekkä kertü küzdä totıla. Şunıñ nigezendä awırularğa konsul'tativ yärdäm, eş belän tä'min itü häm şulay uq yuridik mäs'älälärdä dä yärdäm kürsätü oyıştırılaçaq. BMO wäkile Yevgeniy Oçkovskiy belderüençä, äf'yun qullanuçılarnıñ şaqtıyı problemanıñ ähämiäte turında xäbärdar tügel. Monnan tış älege proyekt irektän mäxrüm itü urınnarında bulğan narkomannarğa da yärdäm kürsätäçäk dip planlaştırıla. Bu keşelärgä narkomaniädän däwalawçı respublikadağı üzäklär, WİÇ awıruına tikşerüçe testlar turında mäğlümat bireläçäk, alarğa eşkä urnaşuda, belem aluda yärdäm kürsäteläçäk, dielde cıyılışta.

Älege mä'älälärgä BMO tarafınnan 100 meñnän artıq dollar aqça bireläçäk. Berläşkän millätlär oyışmasınıñ äf'yun häm cinayätçelek buyınça idäräseneñ Rusiä häm Belorussiädäge wäkillegeneñ citäkçese Flavio Mirella süzlärenä qarağanda, Tatarstanğa bu aqçalar ber ay çaması uzğaç kiläçäk. Şunısın da äytergä kiräk, älege proyekt respublikağa çit illärdäge eşçänlekneñ täcribäse belän dä tanışırğa mömkinçelek birä.

Keşene äf'yunnän saqlap qaluda ğöref-ğadätlär, din şaqtıy möhim urında tora. Bilgele bulğança, tatar mäktäplärendä, mädräsälärdä narkomannar bik siräk oçrıy. Bu xaqta Xalıqara oyışma wäkilläre ni uylıy ikän? BMO wäkile İlze Yekabone bolay dide:

Milli häm dini oyışmalarnıñ role profilaktik çaralarda, ä bigräk tä narkomaniäne däwalawda zur. Monı onıtırğa yaramıy. Bu mäs'älädä din bik ähämiätle urında. Bu dönya täcribäse.

Al'bina Zäynulla

XS
SM
MD
LG