Accessibility links

шимбә, 10 декабрь 2016, Казан вакыты 23:46

Qazandağı eçke ğäskärlär xärbiläreneñ xäle


Rusiädäge böten xärbi büleklärne dä ber seberke belän seberergä yaramıy. Qayda xällär naçar, mäğlümat çaraları aylar buyı şunı söyli, kürsätä, yaza, dip zampolit mayor Andrey Veselov häm bülek komandirınıñ yärdämçese, şulay uq mayor, Maksim Zadovski belän qızıp-qızıp fiker alışu başlandı. Bu ike mayor belän Qazan şähäreneñ 5598- nçe xärbi bülegendä Rusiä eçke eşlär ministrlığınıñ eçke ğäskärlär köne uñayınnan oçraştıq. 27 martta alar üzläreneñ hönäri bäyrämnären bilgeläp ütä. Äle soñğı xärbi xezmätkä çaqırılış waqıtında ğına da bu bülekkä Tatarstannan 100- gä yaqın yeget kilgän.

Soñğı yıllarda elekkeräk belän çağıştırğanda bezgä mäktäplärdän fizkul'tura däreslären äyterseñ bötenläy işetmägännär dä kilä.

Di zampolit Andrey Veselov. Äti-änilär üzläreneñ balalarınıñ saw-sälamät häm nıq bulıp üsülärenä bötenläy ixtibar birmi digän tä'sir qala, di Maksim Zadovski. Alar elekke yıllarda yäşüsmerlärneñ GTO normaların ütäp sälämätleklären nığıtqan waqıtlarnı da iskä töşerde. Menä yuğarı uqu yortın beterep kilgän yäş ofitser şuşı qısqa ğına waqıt eçendä xärbi xezmätkä kilgännärne sälämätlege dä nıq, sport normaların üti ala torğan itep ayaqqa bastırırğa tieş. Ul yäş ofitser 11 meñ sum aqça ala. Küpme bu?

Cämğiät moña üze bäye birergä tieş. Küpme bu äzme? Barsı da çağıştırğan waqıtta açıqlana. Misal öçen, Qazanda öç täwlek yal itep, ber täwlek eşli torğan saqta utıra torğan keşe 10 meñ sum ala. Soldatnı öyrätergä, tärbiälärgä tieş ofitser da şulqädär genä aqça ala. Xäzer äti-änilärneñ küpçelege üz balalarına sin xärbi xezmätkä bar anda aqılğa öyräterlär, dip cibärä. Şulay itep bügenge köndäge cämğiättä armiägä xezmät belän tözätü koloniäsenä qarağan kebek qaraş yäşi.

di zampolit. Annan da qala Veselov süzlärenä kürä, qayber ata-analarnıñ bezneñ malaynıñ “zağulğa kitä” torğan, yäğni tuqtalusız araqı eçep ala torğan ğädäte bar, şuña kürä anı ber qaya da cibärmägez, dip kisätkän oçraqları da bula ikän. Bez ofitserlar belän Rusiä armiäsendäge qayber problemalarnı barladıq.

Qazan şähärendäge 5598- nçe xärbi bülek üzeneñ iseme belän dä ciseme belän dä başqa büleklärdän ayırılıp tora. Monda maxsus bilgelänü otryadı urnaşqan. 2004 yılda Qazanğa säfärläre waqıtında Yevropa Berlegeneñ keşe xoquqları departamentı başlığı Al'varo Xil'-Robles häm Rusiäneñ "Za grajdanskoe dostoinstvo" xäräkäte başlığı Ella Panfilova da kilgän bulğan. Ofitserlar bu oçraşunı iskä alıp kem- kem barsın da qazıp çığara torğan Panfilova, bezdä bulğanda bik qänäğät qaldı. Alarğa bülek oşadı. Bu xaqta bezneñ qunaqlar kitabına da yazıp qaldırdılar, dip äyttelär. Keşe xoquqların yaqlawçılar kilergä ber yıl qala bu xärbi bülektä kapital' tözekländerü eşläre başqarılğan bulğan. Xäzer dä ul waqıttağı çistalıqnı, tärtipne saqlıybız dilär ofitserlar. Qazanğa kilgän qunaqlarnı häm xärbilär tormışı belän qızıqsınğan xäbärçelärne bu xärbi bülekkä cibärergä tırışalar. Rusiä eçke eşlär ministrlığınıñ eçke ğäskärlär köne uñayınnan berär xärbi bülekkä barıp bulmas mikän digäç, Tatarstan eçke eşlär ministrlığınıñ matbuğat üzägennän aldan üzläre şaltıratıp söyläşep, miña da şunda barırğa quştılar.

2007 yılınıñ 8 martında bu bülek ofitserları aldında torğan fatir probleması da xäl iteläçäk. Bülek yanında ğına 60 fatirlı toraq tözelep betep kilä. Bu maxsus bilgelänü bülegendä xezmät itüçelär qanunı bulmağan qorallı törkemnärne yuq tiergä, terror ğämällärenä qarşı torırğa, keşelär totıq itep alınğan oçraqta äzer bulırğa tieş. Şuña kürä, ofitserlar äytüençä, monda tuqlanuğa zur iğtibar birelä. Xezmät itüçelär berniçä törle aştan, menyudan üzläre saylap alırğa tieş. Eçke ğäskärlär köne uñayınnan isä, ballı bäleşlär dä bulaçaq dip äyttelär alar.

Äle 3 ay ğına xezmät itkän Çallıdan kilgän keräşen yegete Vladislav Batıyev irtägä bäyräm diäse könne töşkä sötle aş, itle solı botqası aşağan. Ä bäyräm könne alarğa vinegret, borçaq aşı yäki käbestä aşı, döge belän kätlit birgännär. Xezmät itü waqıtı betärgä 3 ay ğına qalğan Çallı yegete İlnaz Mirqasıymov bäyräm könne östäldä ballı äyberlär kürenmi şul di. Tämle äyberlär aşıysıbız kilsä, xärbi bülek eçendäge kafeğa yögeräbez, di ul. İlnaz Mirqasıymov äytüençä, yaña kilgännär xärbi uqu waqıtın uzğaç, telägännär kontrakt tözi ala. Alarnı 6 ayğa Kavkazğa da cibärergä mömkinnär. Ämma ul kontrakt tözep, tormışın qıl oçına quyunı kiräk sanamağan.

Nail Alan.

XS
SM
MD
LG