Accessibility links

шимбә, 3 декабрь 2016, Казан вакыты 01:36

Tatarstan törmälärendä mäçetlär yabılmıy


Şuşı könnärdä ISLAN NEWS säxifäsendä “Tatarstan törmälärendä mäçetlär yabıla. Cinayätçelär comğa könne genä mäçetkä barıp namaz uqı alaçaq. Başqa namazlarnı alarğa üz bülmälärendä uqırğa turı kilär” digän xäbär taratıldı. Möselmannar älege xälne, keşe xoquqların kimsetü dip sanıy, häm bu mä’säläne Tatarstan prezidentı däräcäsendä xäl itärgä uylıy. Törmälärdä mäçetlär tözü eşen başlap cibärgän, häm härdaim bu ölkäne küzätep torğan oyışmalarda bu xäbärne qatği inqar ittelär. Möselman dinenä qağılğan yalğan mäğlümat taratıp massaküläm mäğlümat çaralarında şaw-şu kütärü kemgä kiräk bulğan. Rusiäneñ Cäzalarnı ütäw federal' xezmäten Tatarstan bülege citäkçese urınbasarı Rafail Davleev bu turıda Azatlıq radiosına menä ni dide.

Bu bik yalğış mäğlümat, çönki küptän tügel genä bez namaz uqu bülmälärennän çığıp üsä başladıq inde, taştan, ağaçtan mäçetlär tözi başladıq. Mäçetlärne yabır öçen bernindi säbäp tä yuq. Kiresençä bez bu yunäleşne xuplıybız. Üzemçä ber-ike kandidat şundıy bar inde. Ömetlänälär, nigäder bezgä kiräkmägän keşelärneñ anda elägergä teläkläre bar. Bezneñ öçen naçar mäğlümat taratuçılar bar inde alar.

Şuşı uq sorawğa Qazandağı 2 nomerlı koloniä citäkçese Färğät Gallämovnıñ fikeren dä tıñlap uzıyq.

Döres tügel ul. Bezneñ sistemada kiresençä. Xäzer menä mendelewskida açıla, Sviäjskiyda açıla, inde süzlär bara tizdän panovçada açıla dip. Kem çığarğandır inde anı. Kiresençä bu bit bezneñ sistemada ğına tügel böten cirdä bit inde ul, mäçet, çirkäw açu, senagogiä bulsın.

Bügenge köndä Tatarstanda xoquq saqlaw sistemasında 14 möselman oyışması eşläp kilä. Alarda barlığı 650 keşe eşli. Törmä citäkçelege tarafınnan soñğı yıllarda ğına da törmälärdä 4 mäçet açılğan. Bıyıl tağın ike mäçet açılırğa tora. Respublika törmälärendä möselman dineneñ niçek taraluı turında Tatarstan Diniä näzarätendä xoquq saqlaw orğannarı belän eşläwçe bülek xezmätkäre İbrahimov Timur

Bolay dip söyläde. Monnan töş ul mäğlümat çaralarında taralğan älege xäbärgä dä üz fikeren belderde.

İnternetqa bu xäbärne kem cibärgän min belmim. Uzğan atnada Qazanda UYI 148/18 min buldım 21 martta, UYI 148/19 20 matta buldım. Sviäjskiyda buldım, bügen menä 18,19 uçrejdenielärgä baram, anda köngä 5 märtäbä namaz uqırğa röxsät bar. Bu doşmannarğa kiräk. İslamski terrorizm, vaxabizm, menä kemgä kiräk bu, şul cibärde ul.

Möselman dine nigezlären tiränten öyränü maqsatınnan, Törmädäge mäçetlärdä bügen xätta kitapxanälär dä açıla. Häm här telägän keşeneñ anda kerep belem alırğa xoquqı bar. İşetkänegezçä, barlıq çığanaqlar da törmälärdä mäçetlär yabıla digän xäbärne inqar itälär. Möselmannarğa qarşı bulğan qayberäwlä, yänä jurnalistikada qara piar dip atalğan, xäyläkär yöreşne qullanğan, digän fikerdä tora alar.

Ğädel Galämetdinov.

XS
SM
MD
LG