Accessibility links

сишәмбе, 6 декабрь 2016, Казан вакыты 03:46

Condoleezza Rice: Olmert ta, Ğabbas ta här ike atna oçraşıp torırğa buldı


Yaqın Könçığış säfären tögälläp kilgän Condoleezza Rice, Quşma Ştatlarnıñ däwlät sekretare, İzrail premyer-ministrı Ehud Olmert ta, fälästin başlığı Mäxmüt Ğabbas ta yaqın aralarda üzara oçraşularnı yañartırğa buldı dip belderde. Rice süzlärenä qarağanda, anda süz xäzer yaqın kiläçäktä fälästin däwläten qoru turında da bara ala.

İkesen dä - Olmertnı da, Ğabbasnı da - söyläşülärdä bögelüçänlek kürsätüe öçen maqtap däwlät sekretare Rice, alar xäzer ike atnağa ber oçraşıp torırğa buldı, dip belderde. Häm alar anda, köndälek problemalarnı ğına tügel, säyäsi ofıqta torğan möhim mäs''älälärne dä qarayaçaq, di Yaqın Könçığış säfären tämamlap kilüçe Condoleezza Rice.

AQŞ däwlät sekretare fikerençä, bu eştä bigräk tä tirä-yündäge ğäräp illäreneñ İzrailgä möğämäläsen yaxşıraq yaqqa üzgärtä başlawı bik möhim:

"Ğäräp däwlätläre yözen İzrailgä taba borılıp, aña, fälästin cirlären basıp alunı tuqtatqaç häm anda bäysez fälästin däwläten qorğaç, İzrailneñ iminlege dä nığıyaçaq digän fikerne citkerergä, ğäräp illäreneñ İzrail totqan urınnı tanuın kürsätergä, suğış bulmawğa qarağanda töbäktä däwamlı solıx urnaştırunıñ möhimlegen añlawın belderergä tieş", di Condoleezza Rice.

Öç kön däwam itkän säfäre barışında Rice İzrail, Ürdün häm fälästin citäkçeläre belän oçraştı. Fälästin yağınnan söyläşülärdä qatnaşqan Säyib Erekat süzlärenä qarağanda, Rice alar belän İzrail arasındağı işeklärne açıq itep totarğa tırışqan.

Berük waqıtta amerikan däwlät sekretare artıq ruxlanudan da kisätä, bolar barısı da fäqät zur ber eşneñ başı ğına bulıp tora, ike yaq aldında da xäl itäse iñ awır problemalar äle alda, dip belderä:

"Bez hiç kenä dä söyläşülärneñ azağında tügel. Älegä bu ike yaq arasında ışanıç urnaştıru öçen alıp barılğan fiker alışular ğına. Fälästinlelär üz däwläte bulaçağın aldan belep torırğa tieş, ä İzrail isä şul däwlätneñ üze öçen qurqınıç tügel, ä iminlek çığanağı bulasın belep torırğa tieş", di Rice.

Yaqın Könçığış söyläşülärendäge uñay täräqqiätkä qomaçawlağan ber faktornı da telgä ala, AQŞ däwlät sekretare. Ul - fälästin xökümätendä qatnaşqan radikal'' Xämas xäräkäte. Xämasnıñ tınıçlıq eşenä birelmäwe, töbäktä köç qullanunı kire qaqmawı, İzrailneñ yäşärgä xoquqı buluın tanımawı häm elekke kileşülärne qabul itmäwe yaña fälästin xökümäte belän xezmättäşlek itü suqmağında kirtä bulıp tora, di Condoleezza Rice.

Bu atnada ğäräp illäreneñ tışqı eşlär ministrları söğüd başqalası Riyadta oçraşıp, İzrail belän solıxqa ireşü ölkäsendä äle 5 yıl elek tözelgän ber plannı yañadan ğämälgä kertü xaqında fiker alışaçaq.

Kärim Kamal
XS
SM
MD
LG