Accessibility links

дүшәмбе, 5 декабрь 2016, Казан вакыты 01:34

“Azatlıq”nı xalıq tarafınnan yaqlaw däwam itä


"Yaña ğasır" radiosı dulqınında "Azatlıq" radiosınıñ tapşırularınıñ waqıtı qısqartıluı Qazan häm respublika tatar cämäğätçelegendä rizasızlıq uyatuı turında tapşırularıbızda xäbär itkän idek inde. Ul daimi tıñlawçılarnıñ qänäğätsezlegen, bik küp östämä soraular tudırdı. Respublikanıñ törle cirlärennän tıñlawçılarıbız bezgä çığıp, retranslyatsiäne qaldıru kiräklegen äyttelär. Mondıy wäzğıät tuğaç, Azatlıq radiosınıñ Qazan byurosına kilä torğan xatlar sanı bik küpkä arttı. Alay ğına da tügel, xatlarnıñ barsında da diärlek tıñlawçılarıbız Azatlıq tapşırularınıñ Yaña ğasırda waqıtı qısqartıluğa üz borçuın belderä. Xätta Azatlıqnı yañadan üz xälenä qaytaru üteneçe belän Tatarstan Prezidentına yazğan xatlarınıñ ber nösxäsen redaksiäbezgä yullağannarı da buldı.

Äytik, Rusiä suqırlar oyışmasınıñ Tatarstan bülekçäse räise urınbasarı Räis Gabdullin Qazan byurosına üzläre qabul itkän möräcäğätne alıp kilgän ide. Tatarstan Prezidentı Mintimer Şäymiev isemenä Azatlıq radiosın Yaña ğasır kanalında tapşıru mömkinlegen kire qaytarırğa sorap yazılğan älege möräcäğätne 42 keşe imzalağan ide. Xatta mondıy yullar bar. “Bezneñ Böbenrusiä suqırlar cämğiäteneñ Qazan bülegendä ber meñgä yaqın tatar bar. Bezgä suqırlarğa radio berdän-ber mäğlumat alu çığanağı bulıp tora. “Azatlıq” tapşıruları bezneñ öçen ruxi baylıq ta, şatlıq häm söyeneç tä, çönki bez ber yañalıqnı da gazeta-jurnallardan uqıy almasaq ta, bez millätebezneñ xälen, törle töbäklärdä yäşägän tatarlarnıñ nuja-şatlıqların belep torabız. “Azatlıq” radiosınnan bez mäğlümatnı niçek bar şulay işetäbez. Häm şuña kürä anıñ respublika radiolarında yabıluın telämibez” dielä suqırlar cämğiätennän xatta.

Pänceşämbe könne isä älege oyışmanıñ räise urınbasarı Räis Gabdullin studiäbezgä şaltıratıp, aña Tatarstan Prezidentı isemennän xat kilüe xäbär itte.

Miña ike atnadan soñ miña cawap xatı kilde. Monda wäzğıät qaralıp, vitse-premyer Moratovqa häm Yaña ğasır kanalınıñ citäkçese Aminov äfändelärgä tapşırılğannarı turında äytelä. Ämma läkin bügenge köngä qädär bez “Azatlıq”nı tulısınça işetä almıybız. Ni öçen soñ bez “Azatlıq” radiosınıñ tapşıruların kötäbez soñ? Çönki respublika radiolarında respublika tormışı turında bik yaxşı tapşırular birä. Ämma çit cirlärdä yäşäwçe millättäşlärebez tormışı turında ber xäbär dä işetep bulmıy. Bu mäs'älä çişeler dip uylıybız, niçek tä bulsa “Azatlıq” tapşıruları respublika radiosı efirına qaytır dip ışanabız.

Yaña ğasırda “Azatlıq” nıñ waqıtı qısqartılu tıñlawçılarıbızğa tınğı birmi. Alar niçek tä bulsa “Azatlıq” nı kire qaytarırğa teli. İnde xäbär itkänebezçä, şuşı könnärdä Çallıda da Azatlıqnı yaqlap uram cıyını uzdı. Bu turıda pänceşämbe könne “Zvezda Poloj'ya” gäzite dä yazıp çıqtı.

Gölnaz Şäyxetdin

XS
SM
MD
LG