Comğa kiç Başqortstannıñ barlıq zur mäçetlärendä iñ qäderle dini bäyrämnärneñ berse – Mäwlid kiçäse zurlap bilgelänä. Ayıruça Ufa şähärendäge töp Cämiğ mäçetendä, “Lalä-Tyul'pan” mäçetendä, İxlas”
häm “Ğufran” mäçetlärendä Mäwlid kiçäse küp keşe qatnaşlığında baytaq çaralar belän bäyräm itelä.
“İxlas” mäçetendä oyıştırılğan bäyräm kiçäsenä yözlärçä din qärdäşlärebez kilde. Tantanalar axşam namazı belän başlana.
“Päygambärebez tuğan kön yıl sayın Mäwlid kiçäse çaraları belän zurlap bilgelänä. Qader kiçäsennän soñ bezneñ öçen iñ söeklese häm qäderlese bu kiçä, - dide mäçetneñ imam- xatibı Möxämmät xäzrät Ğalläm. - Bu könne Möxämmäd päygambärneñ tuuına şatlanuçılarnıñ gönahları kiçerelä, anıñ moğcizalı tormışı turında uqu, tıñlaw häm söyläw sawaplı eşlärdän sanala. Älege kiçäbezgä yözlärçä din ähele, şäkertlär genä tügel, ä ğalimnär, millät zıyalıları häm balalar da kilüe kiñ cämäğätçelekneñ soñğı waqıtta imanğa, dingä tartıluına nıqlı dälil ul. İnşalla, kiläçäktä dä möselman ömmätendäge xalıqlarıbız ruxi asılıbızğa qaytır, tormışıbız yämläner”.
Fänis Fätxi, Ufa.
