Accessibility links

якшәмбе, 4 декабрь 2016, Казан вакыты 02:57

Ukraina prezidentı säyäsi fraksiälär belän söyläşülär uzdırdı


Bügen Ukraina prezidentı Viktor Yuçenko Kievta parlamenttağı säyäsi fraksiälär başlıqları belän oçraştı. İldä tuğan säyäsi nizaqnıñ nigezendä – parlamenttağı krizis yata, dip belderde Yuçenko. Nizaq – 23 martta oppozisiädäge 11 deputatnıñ koalisiägä küçüennän başlanıp kitte. Prezident bu adımnı konstitusiägä qarşı kilä dip, Yuğarı Radanı taratu häm yaña saylawlar bilgeläw belän yanadı.

Uzğan şimbä könne prezident Viktor Yuçenko belän premyer-ministr Viktor Yanukoviç arasındağı nizaq – xalıqnı Kievnıñ ike zur mäydanına çığarğa mäcbür itte. Bäysezlek mäydanında 70 meñgä yaqın Yuçenko tarafdarı, 300 metr yıraqlıqta 2 meñgä yaqın Yanukoviç yaqlı keşelär cıyıldı. Yanukoviç yaqlılar parlamentnı taratu häm yaña saylawlarğa qarşı ide. Bu ike uram cıyını arasında 4 rät metal räşätkä häm polisiä torğan. Cıynnıñ ikese dä şimbä könne rok tamaşalar belän tämamlanğan.

Bügen isä Yuçenko parlamenttağı säyäsi fraksiälär citäkçeläre belän oçraştı. Söyläşülärdä Yuğarı Rada räise Aleksandr Moroz, anıñ berençe urınbasarı, fraksiälär başlıqları, şul sanda Yulia Tymoşenko häm kommunistlar fraksiäse başlığı Petr Simonenko qatnaştı. Simonenko, "Yuçenkonıñ parlamentnı taratu turındağı färmanı qanunsız bulaçaq", dip belderde.

Bügen dä Yuçenkonıñ bu qararına qarşı berniçä meñ keşe protest belderergä çıqtı. Yuçenko üze, ildä demokratik qimmätlär qaqşadı, dip belderde:

"İldä konstitusion totrıqsızlıq tua. Xakimiätneñ tarmaqları arasında balans yuğala. Xakimiätne ber qulda totu omtılışı kürenä. Demokratik ideallar häm cämğiätneñ nigezläre qaqşıy."

Prezident Radadağı Mäskäw yaqlı säyäsi köçlärne, Yuçenko tarafdarların – fikerne üzgärtep üz yaqlarına küçergä öndäwdä ğäyepläde.

Çit il matbuğatında Ukraina iğtibar üzägendä. Ayırım zur urın bügen Ukraina turındağı küzätülärgä Germaniädä çığuçı basmalarda birelgän.

Alsu Qormaş
XS
SM
MD
LG