Tübän Kama şähärendä tatar teleneñ torışı, üseşe buyınça Bötendönya tatar kongressınıñ cirle bülege häm tatar ictimaği üzäge citäkçeläre, wäkilläre quldan kilgänçä eş alıp baralar. İctimaği Üzäk räise, şähär şurası deputatı Xälil Äyupov belän söyläşkän waqıtta bügenge Tübän Qamadağı tatar teleneñ torışı belän qızıqsındım.
- Qänäğät disäñ, döres bulmas, bu - ber urında torunı añlatır ide. Här keşe artqa qarap, ütkännärne barlap, alğa barırğa tieş,- di Xälil äfände. Anıñ äytüençä, Tübän Qamanıñ balalar baqçalarında, mäktäplärendä tatar telen üsterü yunäleşendä xäzer dä eş alıp barıla. "Telne qullanu, telne faydalanu ölkäsen arttıru buyınça maqsat quyılsa, alğa kiteş bula", dip sanıy ul. Tatarstannıñ här şähäre, xätta här rayonı küpmillätle bulıp tora. Başqa millätlär arasında tatar tele üseşenä qarşılıq belderülär bulmıymı soñ? Tatar ictimaği üzäge räise bu sorawğa ğadi genä itep bolay dide:
- Başqa millätlär tatar ilendä yäşilär, şunı añlap, tatar tele buyınça alıp barılğan ğämällärgä qarşılıqları sizelmi. Üzem dä ber millätkä dä qarşı tügel, barısın da yaratam di Xälil Äyupov. Anıñ qayber tatar tanışları xäzerge waqıtta Üzbäkstanda üzbäkçä söyläşep, aralaşıp yäşilär ikän häm inde Tatarstanda başqa millätlär belän tatarça aralaşsañ, yaxşı bulır ide, digän fikerdä tora. Xälil Äyupov mondıy misal kiterde:
"Şähärdä ğömer buyı "Cälil" isemen yörtkän kinoteatrnıñ iseme monnan 2 yıl elek yuqqa çığa. Şähärdäge milli xäräkät wäkilläre tatar şağireneñ isemen kire qaytarunı taläp itkännän soñ, berniçä aydan kinoteatr östendä "Djalil'" digän, yägni, Cälilneñ urısça variantı barlıqqa kilä. Älege küreneşkä qarşı köräş başlanğaç, urısça variant ta yuğala. Tağın berniçä aylıq söyläşülärdän soñ ğına Cälil iseme kinoteatrğa qabat qayta. Milli yunäleştä eşläwne kürsätergä älege misal bik keçkenä kebek, läkin bik ğibrätle misal. Bezgä här mäs'älädä maqsatıbızğa ireşergä kiräk, bu - waqçıllanu tügel, ähämiätle närsä, digän fikerdä tora Äyupov.
Küptän tügel Tübän Qamada tatar telen saqlaw, üsterü buyınça şähär häm rayon külämendä maxsus programma qabul itelgän. Mondıy programma Tübän Qamada berençese genä ikän häm ber yıl eçendä ğamäldä bulaçaq. Alğa taba 3-5 yıllıq programma qabul itü farazlana. Älegä, bulğan programmanı tormışqa aşıru buyınça daimi komissiä tözelä häm anıñ räise şähär başlığı. Alda äytelgän komissiä, programma belän bergä Tübän Qamada bik säyer isemle Äxtübä uramı da barlıqqa kilä. Älege uramnıñ urısça äyteleşe - Axtyubinskaya. "Axtyubinskaya" üzä Aqtübä süzennän yasalğan. Şulay buluğa da karamastan, Äxtübägä äylängän. Dimäk, yaña komissiägä eş bar.
Ğafiulla Ğaziz, Çallı
