Accessibility links

сишәмбе, 6 декабрь 2016, Казан вакыты 08:45

Tözeleştä qorbannar sanı arta


Rusiädäge qatlawlı demografik wäzğıäteneñ ber säbäbe - naçar eş şartları. Awırularnıñ şaqtıyı şunnan kilep çığa. Eşkä sälätle keşelärneñ qırıla baruında da zavod-fabrikalar, tözeleştäge naçar eş şartlarınıñ tä'sire zur, di belgeçlär. Şuña da eşçelärneñ sälämätlegen qayğırtu bik ähämiätle. Rusiäneñ sänäğät şirkätlärendä yıl sayın 100 meñnän artıq keşe cäräxätlänä. Şularnıñ 3-4 meñe wafat bula.

Tatarstanğa kilgändä, respublika şirkätlärendä imgänüçelär soñğı öç yılda kimegän. Ämma şatlanırğa urın yuq. Çönki imgänep ülüçe eşçelär sanı bermä ber arta ikän. Xökümätneñ tatarstanlılarnıñ yäşäw däräcäsen kütärergä tırışıp yörüe bu sannarda berniçek tä çağılmıy. Uzğan yılda ğına Tatarstan sänäğät şirkätlärendä 120 keşesen yuğaltqan. 1400е törle däräcädäge cäräxätlär alğan. Bu xaqta respublikanıñ ministrlar kabinetında uzğan cıyılışta äytelde. İñ küp ülüçelär Saba, Yäşel Üzän rayonnarı, Alabuğa, Norlatta terkälgän. Qorbannarnıñ artuın tözeleştä faciğälär kübäyue belän añlattılar.

Marat Şämsetdinov Qazanda 16 qatlı yort tözi. Tözeleştäge eş şartları turında, keşelärneñ sawlığın, iminlegen qayğırtu niçek tora digän sorawğa ul “Azatlıq”qa bolay dip söyläde:

Bez zur yort tözibez. Monda saqlanu çaralarınıñ yartısı diärlek qullanılmıy. Ä çistalıq turında äytäse dä yuq, gigiena digän närsäne ğomumän uylawçı yuq. Sälämätlek öçen zıyan bik küp. Qısqası, monda bezneñ sälämätleklär betä dä inde..

Eşçelärneñ sawlığın, iminlegen qayğırtuğa küp kenä şirkät citäkçeläre bik salqın qarıy. Şuña da alarnıñ yış qına maxsus kiemnäre, başlarında kaska bulmıy. Xezmät häm mäşgul'lek ministrlığı wäkilläreneñ süzlärenä qarağanda, mondıy tärtipsezlek nigezdä şäxsi şirkätlärdä küzätelä. Sänäğät tarmağında qorbannar sanı artuı türälärne dä borçuğa saldı. Wäzğıätne caylaw öçen ministrlıq wäkilläre nindi çaralar äzerli soñ? Bu xaqta Tatarstan ministrlığınıñ xezmätne saqlaw bülegeneñ citäkçese urınbasarı Lidiä Kalantayıwa söyläde:

Älege waqıtta bez rezolyutsiäne äzerlibez. Tatarstannıñ 2007-2009 yıllarğa sotsial'-iqtisadi säyäsäte turında kileşü tözelde. Anı respublikanıñ ministrlar kabinetı, profsoyuzlar federatsiäse, eşmäkärlär assotsiatsiäse häm säwdä-sänäğät palatası wäkilläre imzaladı. Älege dokumentta xezmätne saqlaw buyınça da çaralar qaralğan. İñ berençedän bulıp, tözeleş ministrlıysında xezmätne saqlawçı belgeçne buldırırğa cıyınabız. Çönki inde berniçä yıl andıy belgeç yuq. Barlıq sänäğät şirkätlärenä dä eşçelärneñ xezmät şartları, sälämätlegen saqlawğa iğtibarnı arttırırğa digän taläplär quyıldı, dip belderde xezmätne saqlaw bülegeneñ citäkçese urınbasarı Lidiä Kalantayıwa.

Al'bina Zäynulla

XS
SM
MD
LG