Accessibility links

чәршәмбе, 7 декабрь 2016, Казан вакыты 13:48

“Aq bars – çempion!” – tügel äle…


““Aq bars” – çempion!” - digän şiğarä Qazanda xäzer iñ populyar şiğarälärneñ berse. Uramda, kofelarda, restorannarda, avtobuslarda bu süzlärne işetergä, “Aq bars” dip yazılğan yäşelle-aqlı kiem-salımnarnı yış kürergä bula. Ayıruça yäşüsmerlär arasında. Alay disäk urta buın keşeläre dä xokkeynı yaratıp qarıy. Ayıruça üzläre yaratqan, can atqan komanda bulsa. 2 aprel' könne dä “Aq bars” öçen can atqan xalıq küp buldı. Alar öçen Qazannıñ kafe-restorannarında küpme sıralar eçep betergännärder ansı bilgesez, läkin xokkey, futbol komandaları öçen sıra eçep can atu ğädätkä kerep bara. “Tatar radiosı”nıñ di-djee Bulat Bäyrämov ta zäñgär ekrannan bulsa da “Aq bars”nıñ finalğa kerü uyının qarap, Qazan komandası öçen borçılıp utırğan. Bulat Bäyrämov kebek törle hönär keşeläre, döresräge ir zatları nervıların beterep, üzläre äytkänçä “beznekelär öçen” can atqannar, qıçqırğannar, sızğırğannar. “Tatar radiosı” kollektivı ir-atları “Aq bars” öçen bar eşlären taşlarğa da rizalar. Şul uq Bäyrämov ta, final uyınına biletlar betkän läkin qayan bulsa da tabıp “Aq bars” belän “Metallurg” köräşen qararğa ide di. Äytkänebezçä, “Aq bars” xokkey komandası Tatarstanda ğorurlıq simvolına äwerelde disäk tä bula. Can atarları artqannan arta, alarğa respublika xökümäte mädäniät, mäğärif häm başqa ölkälärgä qarağanda finans yaqtan, moral' yaqtan iğtibarın arttıra bara. Citäkçelek tä näq menä şul xokkeynı üz kürä. Qazan merı İlsur Metşin ğına da mäktäp yäşendäge malayı belän Qazanda çığa torğan gazetalarda xokkey kiemendä küpme basılğandır. 2 aprel'dä “Aq bars” belän Mäskäwneñ SSQA komandaları arasındağı uyın, bigräk tä soñğıları ğayät däräcädä saqlanıp, höcümgä artıq kütärelmiçä uzdı dip yazdı sport jurnalistları. Ä can atarlar uyınnı başqaçaraq bäyäläde: - Uyınçılar arğannar ide. Balalar kebek uynadılar, ber-bersen törtep uynıy başladılar, öslärenä asılındılar. Läkin beznekelär barıber ottılar, wät ansı şäp ide. Bu Qazanda yäşäwçe İrek isemle “Aq bars” nıñ tuğrılıqlı dustı buldı. Finalda Qazanlılar Magnitogors şähäreneñ “Metallurg” xokkeyçıları belän köç sınaşaçaqlar. Äytergä kiräk, Magnitogorsk xokkeyçıları ğayät qurqınıç dilär, “Aq bars” qa bıltırğı uñışnı qabatlaw öçen şaqtıy tir tügärgä kiräk bulaçaq ikän. Läkin Qazan komandasınıñ can atarları yaxşığa ömetlänälär. Öç süzneñ bersendä “Aq bars – çempion!” dip qabatlıylar. Röstäm İsxaqi

XS
SM
MD
LG